പട്ന: പ്രധാനമന്ത്രി നരേന്ദ്രമോദിയെ പ്രശംസിച്ച ജെഡിയു എംപിയുടെ രാജി ആവശ്യപ്പെട്ട് പാർട്ടി നേതൃത്വം. അസാധ്യമായതെന്തും പ്രധാനമന്ത്രി നരേന്ദ്രമോദി സാധ്യമാക്കുമെന്നാണ് സീതാമർഹിയിൽ നിന്നുള്ള ജെഡിയു എംപി സുനിൽകുമാർ പിന്റു പ്രധാനമന്ത്രി നരേന്ദ്രമോദിയെ പ്രശംസിച്ച് പറഞ്ഞത്. ബിജെപിയുടെ തിരഞ്ഞെടുപ്പ് മുദ്രാവാക്യമാണ് സുനിൽകുമാറും ആവർത്തിച്ചത്. മദ്ധ്യപ്രദേശ്, ഛത്തീസ്ഗഡ്, രാജസ്ഥാൻ എന്നീ സംസ്ഥാനങ്ങളിലെ തിരഞ്ഞെടുപ്പ് ഫലപ്രഖ്യാപനത്തിന് പിന്നാലെയാണ് സുനിൽകുമാറിന്റെ പ്രതികരണം.
രാജസ്ഥാനിലും ഛത്തീസ്ഗഡിലും കോൺഗ്രസിനെ അധികാരത്തിൽ നിന്ന് പുറത്താക്കിയാണ് ബിജെപി ഭരണം പിടിച്ചത്. ” തിരഞ്ഞെടുപ്പ് ഫലം കാണുമ്പോൾ കാണുമ്പോൾ ഒരു കാര്യമാണ് മനസിലാകുന്നത്. അസാധ്യമായതെന്നും നരേന്ദ്രമോദി സാധ്യമാക്കും. നിയമസഭാ തിരഞ്ഞെടുപ്പ് പ്രചാരണത്തിനിടെ ബിജെപി ഉയർത്തിയ ഈ വാക്കുകൾ വളരെ ശരിയാണെന്നും” സുനിൽകുമാർ പറഞ്ഞു. പിന്നാലെ ഇയാൾക്കെതിരെ പാർട്ടി നേതൃത്വം രംഗത്തെത്തുകയായിരുന്നു.
പ്രധാനമന്ത്രി നരേന്ദ്രമോദി, സുനിൽകുമാറിനെ അത്രയ്ക്ക് സ്വാധീനിച്ചിട്ടുണ്ടെങ്കിൽ അദ്ദേഹം ലോക്സഭാംഗത്വം രാജി വയ്ക്കണമെന്നും, പാർട്ടിയിൽ തുടരുന്നതിൽ ഉൾപ്പെടെ ഉടനെ തീരുമാനം എടുക്കണമെന്നും പാർട്ടി വക്താവ് നീരജ് കുമാർ ആവശ്യപ്പെട്ടു. അതേസമയം ബിജെപി വക്താവ് കുന്തൽ കൃഷ്ണ സുനിൽകുമാറിനെ പിന്തുണച്ച് രംഗത്തെത്തി. ലോക്സഭാ തിരഞ്ഞെടുപ്പിന് മുൻപായി സ്ഥിതിഗതികൾ എന്താണെന്ന് ഓരോ വ്യക്തിയും മനസിലാക്കി കഴിഞ്ഞുവെന്നാണ് കുന്തൽ കൃഷ്ണ പറഞ്ഞത്.