മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്യുന്ന ചിത്രമാണ് നേര്. കോർട്ട് റൂം ഡ്രാമയായ ചിത്രം ഈ മാസം 21-ന് പ്രദർശനത്തിനെത്തുമെന്ന് അണിയറപ്രവർത്തകർ ആദ്യമെ അറിയിച്ചിരുന്നു. എന്നാൽ ചിത്രം പുറത്തിറങ്ങാനുള്ള ദിവസങ്ങൾ അടുക്കും തോറും ചിത്രത്തിന്റെ ടീസറിനെ കുറിച്ചോ ട്രെയിലറിനെ കുറിച്ചോ വിവരങ്ങൾ ഒന്നും തന്നെ വന്നിട്ടില്ലായിരുന്നു.
എന്നാൽ ചിത്രം എത്താൻ ഇനി ദിവസങ്ങൾ ബാക്കി നിൽക്കെ നേരിന്റെ ട്രെയിലർ നാളെ റിലീസാകുമെന്ന പ്രഖ്യാപനമാണ് അണിയറപ്രവർത്തകർ നടത്തിയിരിക്കുന്നത്. നാളെ വൈകുന്നേരം അഞ്ച് മണിക്കാണ് ചിത്രത്തിന്റെ ട്രെയിലർ റിലീസ്.
മോഹൻലാൽ- ജീത്തു ജോസഫ് കൂട്ടുകെട്ടിൽ വീണ്ടും വിജയം ആവർത്തിക്കുവാൻ വേണ്ടി ഒരുങ്ങുന്ന ചിത്രമാണ് നേര്. അഭിഭാഷകന്റെ വേഷത്തിലാണ് ചിത്രത്തിൽ മോഹൻലാൽ എത്തുന്നത്. കൂടതെ പ്രിയാമണിയും ചിത്രത്തിൽ കേന്ദ്രകഥാപാത്രത്തെ അവതരിപ്പിക്കുന്നുണ്ട്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നേരിന്റെ നിർമ്മാണം.
ചിത്രത്തിന്റെ തിരക്കഥ ഒരുക്കിയിരിക്കുന്നത് അഭിഭാഷകയും അഭിനേത്രിയും കൂടിയായ ശാന്തി മായാദേവിയാണ്. മലയാളം, തമിഴ് സിനിമകളിൽ വക്കീൽ വേഷങ്ങളിൽ ശാന്തി പ്രത്യക്ഷപ്പെട്ടിട്ടുണ്ട്. സതീഷ് കുറുപ്പാണ് ചിത്രത്തിന്റെ ഛായാഗ്രഹണം. വിഷ്ണു ശ്യാം ചിത്രത്തിന് സംഗീത സംവിധാനവും ഒരുക്കുന്നു.
