ലാൻഡ് റോവറിന്റെ ഉടമസ്ഥതയിലുള്ള ആദ്യ ഇലക്ട്രിക് വാഹനത്തിന്റെ കൂടുതൽ സൂചനകൾ പുറത്ത്. ഇവിയുടെ സൂചനകൾ നൽകുന്ന ടീസർ കമ്പനി പുറത്തുവിട്ടിരിക്കുകയാണ്. കമ്പനി ഇതുവരെ പുറത്തിറക്കിയതിൽ വച്ച് ഏറ്റവും മികച്ച വാഹനമായിരിക്കും ഇതെന്നാണ് പുറത്തു വരുന്ന റിപ്പോർട്ടുകൾ. റേഞ്ച് റോവർ ഇലക്ട്രിക് എസ് യു വി എന്നാണ് കമ്പനി പേര് നൽകിയിരിക്കുന്നത്.
2024-ന്റെ തുടക്കത്തോടെ റോവറിന്റെ ആദ്യ ഇലക്ട്രിക് മോഡൽ വിപണിയിലെത്തിയേക്കുമെന്നാണ് മുമ്പ് കമ്പനി അറിയിച്ചത്. റേഞ്ച് റോവറിലുള്ള ഏതാനും ഡിസൈൻ ഫീച്ചറുകൾ പുതിയതായി പുറത്തിറക്കുന്ന ഇവിയിലുമുണ്ടാകും എന്നാണ് റിപ്പോർട്ടുകൾ. റേഞ്ച് റോവർ ഇലക്ട്രിക്, വി8 എൻജിനുള്ള റേഞ്ച് റോവർ മോഡലിന് സമാനമായിരിക്കുമെന്നാണ് കമ്പനി അവകാശപ്പെടുന്നത്.
ജാഗ്വർ ലാൻഡ് റോവറിന്റെ ഫ്ളെക്സിബിൾ മോഡുലാർ ലോംഗിറ്റിയൂഡിനൽ ആർകിടെക്ചർ എന്നിവ അടിസ്ഥാനമാക്കിയാണ് റേഞ്ച് ഓവർ ഇവി എസ്യുവി സജ്ജമാക്കിയിരിക്കുന്നത്. വാഹനം വേഗത്തിൽ ചാർജ് ചെയ്യുന്നതിനുള്ള സംവിധാനം ഉറപ്പാക്കുന്നതിന് 800 വോൾട്ട് ചാർജിംഗ് സംവിധാനം ഒരുക്കുമെന്ന് കമ്പനി അറിയിച്ചു. ഇലക്ട്രിക് ഡ്രൈവ് സിസ്റ്റം, ബാറ്ററി എന്നിവയുടെ കാര്യക്ഷമത എന്നിവ വിലയിരുത്തുന്നതിന് വിവിധ മേഖലകളിൽ പരീക്ഷണയോട്ടം നടത്തുമെന്ന് കമ്പനി അറിയിച്ചിട്ടുണ്ട്.
