പാറ്റ്ന: മദ്ധ്യപ്രദേശിലെ കോൺഗ്രസ് എംഎൽഎയുടെ മരുമകളെ വീട്ടിനുള്ളിൽ മരിച്ച നിലയിൽ കണ്ടെത്തി. ചിന്ദ്വാരയിൽ നിന്നുള്ള എംഎഎ സോഹൻലാൽ വാൽമീകിയുടെ മകന്റെ ഭാര്യ മോണിക്കയുടെ മൃതദേഹമാണ് തൂങ്ങിയ നിലയിൽ കണ്ടെത്തിയത്. രണ്ടര വർഷം മുൻപാണ് സോഹൻലാലിന്റെ മകൻ ആദിത്യയുമായി മോണിക്കയുടെ വിവാഹം നടന്നത്. പോലീസ് സ്ഥലത്തെത്തി വീട് സീൽ ചെയ്ത് അന്വേഷണം ആരംഭിച്ചു.
പരാസിയ പോലീസ് സ്റ്റേഷൻ പരിധിയിലെ മംഗ്ലി ബസാറിലുള്ള വീട്ടിൽ നിന്നാണ് മൃതദേഹം കണ്ടെടുത്തത്. രാവിലെ ഏറെ നേരം കഴിഞ്ഞിട്ടും മോണിക്ക മുറിക്ക് പുറത്ത് വരാത്തതിനെ തുടർന്ന് വാതിൽ തകർത്ത് അകത്ത് കടന്നപ്പോൾ മോണിക്ക മുറിയിൽ തൂങ്ങിക്കിടക്കുകയായിരുന്നുവെന്ന് എംഎൽഎയുടെ കുടുംബം പറയുന്നു. വീട്ടുകാർ യുവതിയെ സ്വകാര്യ ആശുപത്രിയിലെത്തിച്ചെങ്കിലും മോണിക്ക മരിച്ചതായി ഡോക്ടർമാർ അറിയിച്ചു.
എംഎൽഎയുടെ മകൻ ആദിത്യയാണ് മകളെ കൊലപ്പെടുത്തിയതെന്ന് മോണിക്കയുടെ അമ്മ ആരോപിച്ചു. വിശദമായ അന്വേഷണം വേണമെന്നും കുടുംബം ആവശ്യപ്പെട്ടു. മൃതദേഹം പോസ്റ്റ്മോർട്ടം നടപടികൾക്കായി സർക്കാർ മെഡിക്കൽ കോളേജിലേക്ക് മാറ്റി. സംഭവ സ്ഥലത്ത് നിന്ന് ആത്മഹത്യാ കുറിപ്പ് കണ്ടെടുത്തിട്ടില്ലെന്ന് പോലീസ് അറിയിച്ചു.