ന്യൂഡൽഹി: അറബിക്കടലിൽ വച്ച് കപ്പൽ തട്ടിക്കൊണ്ടു പോകാനുള്ള ശ്രമം ചെറുത്ത് ഇന്ത്യൻ നാവിക സേന. മാൾട്ടയിൽ നിന്ന് സൊമാലിയയിലേക്ക് പോകുകയായിരുന്ന എം.വി റൂയൻ എന്ന ചരക്കുകപ്പൽ തട്ടിക്കൊണ്ട് പോകാനുള്ള ശ്രമമായിരുന്നു നടന്നത്. കപ്പലിന് നേരെ കൊള്ളക്കാരുടെ ആക്രമണമുണ്ടാകുകയും നിയന്ത്രണം നഷ്ടപ്പെടുകയുമായിരുന്നു. അപായ മുന്നറിയിപ്പ് ലഭിച്ചതോടെ കപ്പലിനരികിലേക്ക് നാവികസേന എത്തി പ്രതിരോധം തീർത്തു.
ഇന്ന് പുലർച്ചെയാണ് മാൾട്ടയുടെ പതാക ഘടിപ്പിച്ച എം.വി റൂയൻ എന്ന കപ്പൽ തട്ടിയെടുക്കാൻ ശ്രമമുണ്ടായത്. 18 ജീവനക്കാരാണ് കപ്പലിൽ ജോലി ചെയ്യുന്നത്. ഇന്ത്യൻ നാവികസേനയുടെ യുദ്ധക്കപ്പലും കടലിൽ പട്രോളിംഗ് നടത്തുന്ന ഹെലികോപ്റ്ററും അപായ മുന്നറിയിപ്പ് ലഭിച്ചതോടെ കപ്പലിന് സമീപം എത്തുകയായിരുന്നു.
കപ്പൽ തട്ടിയെടുക്കാനുള്ള ശ്രമം എവിടെ നിന്നാണ് ഉണ്ടായതെന്ന് അധികൃതർ വ്യക്തമാക്കിയിട്ടില്ല. കപ്പൽ നിലവിൽ സുരക്ഷിതമാണെന്നും സൊമാലിയൻ മേഖലയിലേക്ക് യാത്ര തുടരുന്ന കപ്പൽ നിരീക്ഷിക്കുന്നുണ്ടെന്നും ഇന്ത്യൻ നേവി അറിയിച്ചു.