നാരങ്ങാ സോഡ, ജീരക സോഡ, മസാല സോഡ തുടങ്ങി നിരവധി സോഡകളാണ് വിപണിയിൽ സുലഭമായി ലഭിക്കുന്നത്. ധാരാളം കാർബോ ഹൈഡ്രേറ്റ് അടങ്ങിയ ഈ പാനിയങ്ങൾ കുടിക്കുന്നത് ശരീരത്തിന് നല്ലതല്ലെന്നു നമുക്ക് അറിയാം. എന്നാൽ ശരീര ഭാരം നിയന്ത്രിക്കുമെന്ന വിധേനയാണ് ഡയ്റ്റ് സോഡകൾ വിപണിയിൽ ഇറങ്ങിയത്. ഇവ ആരോഗ്യത്തിന് നല്ലതാണെന്നായിരിക്കും നമ്മിൽ പലരും വിചാരിക്കുന്നത്. എന്നാൽ പഠനങ്ങൾ പറയുന്നത് ഇങ്ങനെയാണ്.
സാധാരണ സോഡകളെ പോലെ തന്നെ ഡയറ്റ് സോഡകളിലും ധാരാളം കെമിക്കലുകൾ അടങ്ങിയിട്ടുണ്ടെന്നാണ് അടുത്തിടെ നടത്തിയ പഠനങ്ങൾ കണ്ടെത്തിയിരിക്കുന്നത്. ഈ സോഡകൾ അമിതമായി കുടിച്ചാൽ കരൾ സംബന്ധമായ രോഗങ്ങൾക്കും കുടൽ സംബന്ധമായ രോഗങ്ങൾക്കും വഴിവെയ്ക്കുന്നു. ശരീരഭാരം നിയന്ത്രിക്കുന്നില്ലെന്നു മാത്രമല്ല ബോഡി മാസ് ഇൻഡക്സ് വർദ്ധിപ്പിക്കാനും രക്തത്തിലെ പഞ്ചസാരയുടെ അളവ് വർദ്ധിപ്പിച്ച് പ്രമേഹ രോഗം വരാനുള്ള സാധ്യതകൾ കൂട്ടുകയും ചെയ്യുന്നു. ഡയറ്റ് സോഡകൾ കുടിക്കുന്നത് ഉയർന്ന രക്തസമ്മർദ്ദത്തിനും കാരണമാകുന്നു. ബിഎംസി പബ്ലിക് ഹെൽത്തിൽ പ്രസിദ്ധീകരിച്ച പുതിയ പഠന റിപ്പോർട്ടിലാണ് ഇത് വ്യക്തമാക്കുന്നത്.
