ഊർജ്ജം നൽകുന്നതിൽ പ്രധാന പങ്ക് വഹിക്കുന്ന ഒന്നാണ് ചായ. അതുപോലെ തന്നെ ആരോഗ്യത്തിന് ഗുണങ്ങൾ നൽകുന്ന ഒന്നാണ് വാഴപ്പഴം. ഇവ രണ്ടിന്റെയും ഗുണങ്ങൾ ഒന്നിച്ച്, ഒറ്റ ഐറ്റത്തിൽ നിന്ന് കിട്ടിയാലോ?! അങ്ങനയൊരു ചായയാണ് ബനാന ടീ. പേര് പോലെ തന്നെ വാഴപ്പഴമാണ് താരം. എന്നാൽ ചായപ്പൊടി ഉപയോഗിക്കാതെയാണ് ഈ ചായ ഉണ്ടാക്കുന്നത്.
നല്ല ഉറക്കം ലഭിക്കുന്നതിന് ഏറെ സഹായിക്കുന്ന ഒന്നാണ് ബനാന ടീ എന്നാണ് വിദഗ്ധർ പറയുന്നത്. ഹൃദയാരോഗ്യത്തിനും ഉറക്കത്തിന്റെ ഗുണനിലവാരത്തിനും സഹായിക്കുന്ന ധാതുക്കളായ പൊട്ടാസ്യത്തിന്റെയും മഗ്നീഷ്യത്തിന്റെയും മികച്ച ഉറവിടമാണ് ബനാന ടീ. ഇതിൽ വിറ്റാമിൻ ബി 6 അടങ്ങിയിട്ടുണ്ട്. രോഗപ്രതിരോധ സംവിധാനത്തെയും ചുവന്ന രക്താണുക്കളുടെ വികാസത്തെയും സഹായിക്കാൻ ഈ ചായയ്ക്ക് കഴിയും. ശരീരഭാരം കുറയ്ക്കാനും ഇത് സഹായിക്കുന്നു.
രക്തസമ്മർദ്ദം നിയന്ത്രിക്കാനും ഈ ചായ സഹായിക്കും. പൊട്ടാസ്യത്തിന്റെ കലവറയാണ് ബനാന ടീ. ബനാന ടീയിൽ കാണപ്പെടുന്ന ഡോപാമൈനും സെറോടോണിനും ഹോർമോണുകളുടെ അളവ് നിയന്ത്രിക്കാനും മാനസികാവസ്ഥ വർദ്ധിപ്പിക്കാനും സഹായിക്കും. ആരോഗ്യദായകമായ ബനാന ടീ എങ്ങനെ ഉണ്ടാക്കാമെന്ന് നോക്കാം..
ആവശ്യമായ ചേരുവകൾ
വാഴപ്പഴം-ഒന്ന്
വെള്ളം -രണ്ട് കപ്പ്
കറുവപ്പട്ട-രണ്ടെണ്ണം
തേൻ-ഒരു സ്പൂൺ
തയ്യാറാക്കുന്ന വിധം
പാത്രം ചൂടാക്കി അതിൽ വെള്ളവും കറുവപ്പട്ടയും ഇട്ടു തിളപ്പിക്കുക. വാഴപ്പഴത്തിന്റെ അറ്റം കളഞ്ഞ് തിളയ്ക്കുന്ന വെള്ളത്തിലേക്ക് ഇടുക. തൊലി കളയാതെ ഇടുന്നതാകും കൂടുതൽ അഭികാമ്യം. കാരണം വാഴപ്പഴത്തോളം ഗുണം നിറഞ്ഞതാണ് തൊലിയും.
തുടർന്ന് ഇത് പത്ത് മിനിറ്റോളം തിളപ്പിക്കുക. പിന്നാലെ ഇത് അരിച്ചെടുക്കുക. രുചിയ്ക്കായി തേന ചേർക്കാവുന്നതാണ്. ഉറങ്ങുന്നതിന് മുൻപായി ഇത് കഴിക്കുന്നത് പെട്ടെന്ന് ഉറക്കത്തിലേക്ക് വഴുതി വീഴാൻ സഹായിക്കും.
