എറണാകുളം: മസ്തിഷ്കാഘാതത്തെത്തുടര്ന്ന് ചികിത്സയിലായിരുന്ന സന്തോഷ് ട്രോഫി താരവും പരിശീലകനുമായ ടി.എ ജാഫര് അന്തരിച്ചു. 1973-ല് കേരളം ആദ്യമായി സന്തോഷ് ട്രോഫി ഉയര്ത്തിയപ്പോള് ടീമിന്റെ ഉപനായകനായിരുന്നു. 92-ലും 93-ലും ചാമ്പ്യന്മാരായ കേരള ടീമിന്റെ പരിശീലകനുമായിരുന്നു ജാഫര്.ഫോര്ട്ട് കൊച്ചിയിലെ യങ്സ്റ്റേഴ്സ് സ്പോര്ട്സ് ക്ലബിലൂടെയായിരുന്നു ടി.എ ജാഫറിന്റെ ഫുട്ബോള്യാത്രയുടെ തുടക്കം.
1963-ലാണ് ആദ്യമായി ടീമില് കളിച്ചത്. അവിടെനിന്ന് എഫ്എസിടിക്ക് വേണ്ടിയും പിന്നീട് ദീര്ഘകാലം പ്രീമിയറിന് വേണ്ടിയും ബൂട്ടണിഞ്ഞു.പിന്നീട് ഫാക്ട് ടീമിന്റെയും പ്രീമിയര് ടയേഴ്സിന്റെയും ഭാഗമായി.1969-ലാണ് കേരള ടീമിന്റെ ജഴ്സി ആദ്യമായിയണിഞ്ഞ്.
1975 വരെ കേരളത്തിനായി കളിച്ചു. 1984 വരെ പ്രീമിയറിലും കളിച്ചു. കേരളത്തില് നിന്ന് അഖിലേന്ത്യാ ടൂര്ണമെന്റ് ജയിക്കുന്ന ആദ്യ ടീമെന്ന ബഹുമതി പ്രീമിയര് സ്വന്തമാക്കുന്നതും ജാഫറിന്റെ നായകത്വത്തിലാണ്. ശ്രീലങ്ക, ബംഗളൂരു, കൊല്ലം എന്നിവിടങ്ങളില് നടന്ന പെന്റാങ്കുലര് ടൂര്ണമെന്റുകളിലും കൊച്ചിയിലെ പ്രദര്ശന മത്സരത്തില് ജര്മ്മനിയെ നേരിട്ട ഇന്ത്യന് ടീമിലും കളിച്ചു.പിന്നീട് തന്റെ 44-ാം വയസില് സ്പോര്ട്സ് കൗണ്സിലില് ചേര്ന്നതോടെ പൂര്ണമായും പരിശീലനത്തിലേക്ക് തിരിഞ്ഞു.
