ദുബായ്: ഫുജൈറയിൽ കല്യാണ ആഘോഷത്തിനിടെ വാഹനവുമായി അഭ്യാസ പ്രകടനം നടത്തിയവരെ പിടികൂടി പോലീസ്. സോഷ്യൽമീഡിയയിൽ അഭ്യാസപ്രകടനത്തിന്റെ വീഡിയോ വൈറലായതോടെ പോലീസ് ഇവരെ കണ്ടെത്തി അറസ്റ്റ് ചെയ്യുകയായിരുന്നു. കല്യാണാഘോഷത്തിന്റെ ഭാഗമായിട്ടാണ് വാഹനം ഉപയോഗിച്ചുള്ള അഭ്യാസ പ്രകടനങ്ങൾ നടത്തിയത്.
നിയമം ലംഘിച്ച് അഭ്യാസം നടത്തുക മാത്രമല്ല, എല്ലാം സോഷ്യൽമീഡിയയിലൂടെ പ്രചരിപ്പിക്കുകയും ചെയ്തു. വീഡിയോ ക്ലിപ്പുകൾ പ്രചരിപ്പിച്ച് ചുരുങ്ങിയ സമയത്തിനുള്ളിൽ തന്നെ ട്രാഫിക് പട്രോളിംഗിനിടെ ഡ്രൈവർമാരെ പിടികൂടി. ഇവർക്കെതിരെ ആവശ്യമായ നിയമനടപടികൾ സ്വീകരിച്ചുവരികയാണെന്ന് ഫുജൈറ പോലീസ് ഡെപ്യൂട്ടി കമാൻഡർ-ഇൻ-ചീഫ് ബ്രിഗേഡിയർ ജനറൽ മുഹമ്മദ് ബിൻ നായിഹ് അൽ താനിജി പറഞ്ഞു.
ട്രാഫിക് നിയമങ്ങൾ പാലിക്കാത്ത ഡ്രൈവർമാർക്കെതിരെ കർശനമായ നടപടികൾ സ്വീകരിക്കുമെന്നും റോഡ് ഉപയോക്താക്കളുടെ സുരക്ഷയിൽ അശ്രദ്ധമായി പെരുമാറുന്നവർക്ക് കടുത്ത പിഴ ചുമത്തുമെന്നും പോലീസ് മുന്നറിയിപ്പ് നൽകി. അശ്രദ്ധമായി വാഹനമോടിക്കുകയും പൊതുനിരത്തിൽ അഭ്യാസ പ്രകടനം നടത്തുകയും സ്വന്തം ജീവനും റോഡ് ഉപയോഗിക്കുന്നവരുടെ ജീവനും അപകടത്തിലാക്കുകയും റോഡ് തകർക്കുകയും ചെയ്ത നിരവധി ഡ്രൈവർമാരെ ഫുജൈറ പോലീസ് അറസ്റ്റ് ചെയ്തിട്ടുണ്ട്.
