ഒരു ചായയിലൂടെയോ കാപ്പിയിലൂടെയോ പ്രഭാതത്തെ വരവേൽക്കാൻ ഇഷ്ടപ്പെടുന്നവരായിരിക്കും നമ്മിൽ പലരും. അതിരാവിലെ ഒരു ചായ കുടിച്ചില്ലെങ്കിൽ പിന്നെ ഉന്മേഷക്കുറവും തലവേദനയും അനുഭവപ്പെടുന്നവരും നമ്മുടെ കൂട്ടത്തിലുണ്ടാവും. എന്നാൽ സാധാരണ ഒരു ചായ കുടിക്കുന്നതിലുപരി കറുവപ്പട്ടയിട്ട് ഒരു ചായകുടിച്ചാലോ? ആരോഗ്യം വർദ്ധിപ്പിക്കുന്ന കാര്യത്തിൽ മുൻപന്തിയിൽ നിൽക്കുന്ന കറുവപ്പട്ട ചായയുടെ ഗുണങ്ങൾ അറിയാം..
ധാരാളം ആന്റി-ഓക്സിഡന്റുകൾ അടങ്ങിയിരിക്കുന്ന കറുവപ്പട്ട രോഗപ്രതിരോധശേഷി വർദ്ധിപ്പിക്കുന്നതിൽ ഉത്തമമാണ്. ഇതിലടങ്ങിയിരിക്കുന്ന ആന്റി- ഇൻഫ്ളമേറ്ററി ഘടങ്ങൾ ശരീരത്തെ തണുപ്പിക്കാൻ സഹായിക്കുന്നു. ഇതിനുപുറമെ സന്ധിവാതം പോലുള്ള രോഗങ്ങളുള്ളവർ കറുവപ്പട്ടയിട്ട ചായയോ കാപ്പിയോ കുടിക്കുന്നത് ശരീരത്തിന് നല്ലതാണ്. ആരോഗ്യം വർദ്ധിപ്പിക്കുന്നതിനൊപ്പം ചർമ്മത്തിന് തിളക്കമേകാനും കറുപ്പട്ട ചായ കുടിക്കുന്നത് നല്ലതാണ്.
ദഹനപ്രശ്നങ്ങൾ, വിശപ്പില്ലായ്മ തുടങ്ങിയ ബുദ്ധിമുട്ടുകൾ അനുഭവിക്കുന്നവർക്ക് കറുവപ്പട്ടയിട്ട ചായയോ കാപ്പിയോ ശീലമാക്കാവുന്നതാണ്. ദഹനപ്രശ്നങ്ങൾ അകറ്റി നെഞ്ചെരിച്ചിൽ, അസിഡിറ്റി തുടങ്ങിയവയകറ്റി ഉന്മേഷം നൽകാൻ ഇത് സഹായിക്കുന്നു. ഗ്രീൻ ടീക്കൊപ്പം കറുവപ്പട്ടയും തേനും നാരങ്ങയും ചേർത്ത് കുടിക്കുന്നത് അമിതഭാരം നിയന്ത്രിച്ച് നിർത്താൻ സഹായിക്കുന്നു. രാവിലെ കറുവപ്പട്ടയിട്ട ചായ കുടിക്കുന്നതിലൂടെ മാനസിക ഉന്മേഷം വർദ്ധിപ്പിക്കാനും സമ്മർദ്ദം കുറയ്ക്കാനും സഹായിക്കുന്നു. നല്ലൊരു വേദന സംഹാരി കൂടിയാണ് കറുവപ്പട്ട. ആർത്തവ സമയങ്ങളിൽ മിക്ക സ്ത്രീകളും അനുഭവിക്കുന്ന ഗുരുതര പ്രശ്നമാണ് വയറുവേദനയും തലവേദനയും. സ്ഥിരമായി കറുവപ്പട്ടയിട്ട ചായയോ കാപ്പിയോ ചൂടുവെള്ളമോ കുടിക്കുന്നത് ഇത്തരം വേനകൾ ചെറുത്തു നിർത്തുന്നതിനൊപ്പം ആർത്തവ സമയങ്ങളിലുള്ള വിഷാദവും അകറ്റി നിർത്തുന്നു. തലച്ചോറിന്റെ പ്രവർത്തനങ്ങൾ കൃത്യമാക്കാൻ സഹായിക്കുന്ന ഔഷധഗുണമുള്ള പദാർത്ഥം കൂടിയാണ് കറുവപ്പട്ട.