ശ്രീനഗർ: കശ്മീരിലെ ഷേർഗാഡി പോലീസ് സ്റ്റേഷൻ രാജ്യത്തെ ഏറ്റവും മികച്ച സ്റ്റേഷനുകളിലൊന്നായി തിരഞ്ഞെടുത്ത് ആഭ്യന്തരമന്ത്രാലയം. ശ്രീനഗറിലെ സിവിൽ ലൈൻസ് ഏരിയയിൽ സ്ഥിതി ചെയ്യുന്ന ഏറ്റവും പഴക്കം ചെന്ന പോലീസ് സ്റ്റേഷനുകളിലൊന്നാണിത്. 2024 ജനുവരി ആദ്യവാരം നടക്കുന്ന ചടങ്ങിൽ ഡിജിപിയുടെ സാന്നിധ്യത്തിൽ ആഭ്യന്തരമന്ത്രി അമിത് ഷാ പുരസ്കാരം കൈമാറും.
ഇവിടുത്തെ പോലീസുകാരുടെ സേവനത്തിനുള്ള അംഗീകാരമാണിതെന്ന് ഷേർഗാഡി സ്റ്റേഷൻ ഹൗസ് ഓഫീസർ ഷൗക്കത്ത് അലി പ്രതികരിച്ചു. “ഇത് അഭിമാന നിമിഷമാണ്. ഈ പോലീസ് സ്റ്റേഷനിൽ നിയോഗിക്കപ്പെടുന്ന എല്ലാ ഉദ്യോഗസ്ഥരുടെയും മനോവീര്യം വർദ്ധിപ്പിക്കാൻ ഈ അംഗീകാരം സഹായിക്കും” ഷൗക്കത്ത് അലി പറഞ്ഞു. ശ്രീനഗറിലെ എല്ലാ പോലീസ് ഉദ്യോഗസ്ഥരെയും എസ്എച്ച്ഒയെയും ഡയറക്ടർ ജനറൽ ഓഫ് പോലീസ് (ഡിജിഒ) ആർആർ സ്വയിൻ അഭിനന്ദിക്കുകയും ചെയ്തു.
സമൂഹത്തിന് മുന്നിൽ നല്ല പ്രതിച്ഛായ സൃഷ്ടിക്കേണ്ടതിന്റെയും മെച്ചപ്പെട്ട സേവനങ്ങൾ പോലീസുകാർ നൽകേണ്ടതിന്റെയും പ്രാധാന്യമാണ് ഈ അംഗീകാരം സൂചിപ്പിക്കുന്നത്. ഓരോ പോലീസുകാരുടെയും കൂട്ടായ പ്രവർത്തനത്തിന്റെ തെളിവാണ് കേന്ദ്രസർക്കാരിന്റെ അംഗീകാരമെന്നും ഡയറക്ടർ ജനറൽ ഓഫ് പോലീസ് അറിയിച്ചു.
കഴിഞ്ഞ അഞ്ച് വർഷത്തിനിടെ രണ്ടാം തവണയാണ് കശ്മീർ താഴ്വരയിലെ ഒരു പോലീസ് സ്റ്റേഷൻ രാജ്യത്തെ ഏറ്റവും മികച്ച സ്റ്റേഷനുകളിലൊന്നായി തിരഞ്ഞെടുക്കപ്പെടുന്നത്. 2018-ൽ ബാരാമുള്ള ജില്ലയിലെ ദംഗിവാച്ച പോലീസ് സ്റ്റേഷൻ ഇന്ത്യയിലെ ഏറ്റവും മികച്ചതായി പ്രഖ്യാപിച്ചിരുന്നു. രാജ്യത്ത് 17,000-ലധികം പോലീസ് സ്റ്റേഷനുകളാണുള്ളത്. എല്ലാ സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽ നിന്നുമായി 74 എണ്ണമാണ് ഷോർട്ട്ലിസ്റ്റ് ചെയ്യപ്പെട്ടത്. ഇതിൽ നിന്നാണ് മികച്ച സ്റ്റേഷനുകളെ തിരഞ്ഞെടുത്തത്.