നമ്മുടെ ഇടയിലുള്ള നല്ലൊരു ശതമാനം ആളുകളും നേരിടുന്ന ഒരു പ്രശ്നമാണ് ഗ്യാസ് നിറഞ്ഞ് വയറ് വീർക്കുന്നത്. അമിതമായി ആഹാരം കഴിച്ചാലും ഒരു നേരം ആഹാരം കഴിച്ചില്ലെങ്കിലും ഇതേ പ്രശ്നം ഉണ്ടാകാറുണ്ട്. ഒരുപാട് നേരം ഇരുന്ന് ജോലികൾ ചെയ്യുന്നവരിലും പൊതുവേ കാണാറുള്ള ഒരു പ്രശ്നമാണ് വയർ വീർത്തുകെട്ടുന്നത്. പ്രധാനമായും ദഹന പ്രശ്നങ്ങളാണ് ഇത്തരത്തിൽ വയർ വീർക്കാൻ കാരണം. ഇതിലൂടെ പല തരത്തിലുള്ള അസ്വസ്ഥതകളും ഉണ്ടാകാറുണ്ട്. ഇത്തരം ആരോഗ്യ പ്രശ്നങ്ങൾ പരിഹരിക്കാൻ എന്തൊക്കെ ചെയ്യാമെന്ന് നോക്കാം..
പ്രധാനമായും ശ്രദ്ധിക്കേണ്ട കാര്യം അമിതമായി ഭക്ഷണം കഴിക്കാതിരിക്കുക എന്നതാണ്. നിശ്ചിത അളവിൽ മാത്രം ഭക്ഷണം കഴിക്കാൻ ശ്രമിക്കുക. മൂന്ന് നേരവും കൃത്യ സമയത്ത് ഭക്ഷണം കഴിക്കാൻ ശ്രമിക്കുക. ഭക്ഷണം ചവച്ചരച്ച് തന്നെ കഴിക്കുക. ആഹാരം കഴിക്കുന്നതിനനുസരിച്ച് വെള്ളം കുടിക്കാനും ശ്രമിക്കുക. വയർ വീർക്കുന്നതിന് ലളിതമായ പൊടിക്കൈകൾ ഇതാ..
ദിവസവും ഉലുവ കഴിക്കുന്നത് വളരെ നല്ലതാണ്. വയറിന് ഉണ്ടാകുന്ന ആരോഗ്യ പ്രശ്നങ്ങളും ശരീരഭാരം കുറയ്ക്കാനുമെല്ലാം ഉലുവ ഉത്തമമാണ്. ഭക്ഷണം പാചകം ചെയ്യുമ്പോൾ ഒരു ചെറിയ അളവ് ഉലുവ അതിനൊപ്പം ചേർത്താൽ മതിയാകും. രാവിലെ ഭക്ഷണം കഴിക്കുന്നതിന് മുൻപ് ഒരു ഗ്ലാസ് വെള്ളത്തിൽ ഒരു സ്പൂൺ ഉലുവ പൊടിച്ചത് ചേർത്ത് കുടിക്കുന്നതും നല്ലതായിരിക്കും.
ഇഞ്ചി ഉപയോഗിക്കുന്നതും വയറിന് നല്ലതാണ്. ദഹനത്തിന് ആവശ്യമായ എൻസൈമുകൾ ഇഞ്ചിയിൽ അടങ്ങിയിട്ടുണ്ട്. ഇഞ്ചി ഭക്ഷണത്തിലും ചായയിലും കുടിക്കുന്ന വെള്ളത്തിലും ചേർക്കുന്നത് നല്ല തായിരിക്കും. ചെറിയ കഷ്ണം ഇഞ്ചി ചേർത്ത് വെള്ളം നന്നായി തിളപ്പിച്ചാറ്റിയ ശേഷം കുടിക്കുന്നത് വയറിനുണ്ടാകുന്ന പ്രശ്നങ്ങൾ ഒരു പരിധി വരെ തടയാൻ സഹായിക്കും.
നിറയെ ആന്റീ ഓക്സിഡന്റുകൾ അടങ്ങിയിട്ടുള്ളതിനാൽ ജീരകവും വയറിന്റെ ആരോഗ്യ പ്രശ്നങ്ങൾ തടയാൻ നല്ലതാണ്. ഭക്ഷണത്തിനൊപ്പവും കുടിക്കുന്ന വെള്ളത്തിൽ ചേർത്തും ജീരകം കഴിക്കാവുന്നതാണ്. ഭക്ഷണം കഴിച്ച ശേഷം കുറച്ച് പെരുംജീരകം കഴിക്കുന്നതും നല്ലതാണ്. ഇവ കൂടാതെ വെളുത്തുള്ളി, പുതിന ഇല, എന്നിവ ഉപയോഗിക്കുന്നതും നല്ലതാണ്.
