സമൂഹമാദ്ധ്യമങ്ങളിൽ ട്രോളുകളിൽ നിറഞ്ഞ് കേരള സിഎം ഗാനം. മുഖ്യമന്ത്രി പിണറായി വിജയനെ പുകഴ്ത്താൻ ഇറക്കിയ ഗാനമാണ് സോഷ്യൽ മീഡിയകളിൽ ചർച്ചയോടൊപ്പം ചിരിപടർത്തുന്നത്. നിഷാന്ത് നിള വരികൾ എഴുതി സംവിധാനം ചെയ്തിരിക്കുന്ന ഗാനത്തിലെ വരികളാണ് ഇപ്പോൾ ചർച്ചാ വിഷയം. പിണറായി വിജയനെയും എൽഡിഎഫ് സർക്കാരിനെയും പുകഴ്ത്താൻ ഇറക്കിയ ഗാനത്തിലെ ചില വരികൾ മുഖ്യമന്ത്രിക്ക് എതിരാകുന്നു എന്നതാണ് സത്യം. മുഖ്യമന്ത്രി സ്വജനപക്ഷവാദിയാണെന്ന് വരെ ഗാനത്തിൽ പറയുന്നു.
മുഖ്യമന്ത്രിയെ കസേരയിൽ നിന്നും പുറത്തിടാൻ ബ്രണ്ണൻ കോളനിയിലേയ്ക്ക് പോകുന്ന ഒരുപറ്റം രാഷ്ട്രീയക്കാർ. പിന്നെ അവിടെ നടക്കുന്ന സംഭവ വികാസങ്ങളുമാണ് ഗാനത്തിൽ ചിത്രീകരിച്ചിരിക്കുന്നത്. യൂട്യൂബിൽ റിലീസ് ചെയ്തിരിക്കുന്ന ഗാനം സാജ് പ്രൊഡക്ഷൻ ഹൗസാണ് നിർമ്മിച്ചിരിക്കുന്നത്.
തീയിൽ കുരുത്തൊരു കുതിരയെ, കൊടുക്കാറ്റിൽ പറക്കും കഴുകനെ…, മുറ്റത്ത് നട്ടമരം വേപ്പ് മരമായി മാറിയടാ…, ഇടതുപക്ഷ പക്ഷികളിൽ ഫീനിക്സ് പക്ഷി പിണറായി ഡാ.., സ്വജനപക്ഷവാദികളിൽ വാദ്യരെന്നും മാസ്റ്ററഡാ… എന്നിങ്ങനെയുള്ള വരികളാണ് ട്രോളുകളിൽ ഇടം പിടിക്കുന്നത്. ശത്രുക്കൾക്ക് പോലും ഈ ഗതി വരുത്തല്ലേ എന്നാണ് സമൂഹമാദ്ധ്യമങ്ങളിൽ നിറയുന്ന കമന്റുകൾ.
