പ്രേക്ഷകർ കാത്തിരിക്കുന്ന മോഹൻലാലിന്റെ അടുത്ത ചിത്രമാണ് മലൈക്കോട്ടൈ വാലിബൻ. ജനുവരി 25-ന് തീയേറ്ററുകളിൽ എത്തുന്ന ചിത്രത്തിന്റെ ഓരോ അപ്ഡേഷനും വൻ ഹൈപ്പാണ് സമൂഹമാദ്ധ്യമങ്ങളിൽ ലഭിക്കുന്നത്. ഇപ്പോൾ ചിത്രത്തിന്റെ പുതിയ പോസ്റ്റർ പുറത്ത് വിട്ടിരിക്കുകയാണ് അണിയറപ്രവർത്തകർ. മോഹൻലാലിന്റെ ഫേസ്ബുക്ക് പേജിലൂടെയാണ് പോസ്റ്റർ പങ്കുവച്ചിരിക്കുന്നത്.
പോസ്റ്ററിൽ ചിത്രത്തിലെ കഥാപാത്രങ്ങളെയെല്ലാം ഉൾപ്പെടുത്തിയിട്ടുണ്ട്. ആയുധങ്ങളുമായി യുദ്ധത്തിനായി ഒരുങ്ങി നിൽക്കുന്ന രൂപവും ഭാവവുമാണ് പശ്ചാത്തലത്തിലുള്ള കഥാപാത്രങ്ങൾക്ക്. ചിത്രത്തിൽ മോഹൻലാൽ ഗംഭീര പ്രകടനം കാഴ്ചവെക്കുമെന്ന് ഉറപ്പിക്കാവുന്നതാണ് പോസ്റ്റർ.
ലിജോ ജോസ് പെല്ലിശ്ശേരി- മോഹൻലാൽ കൂട്ടുകെട്ടിൽ വരുന്നതിനാൽ തന്നെ ആരാധകർക്കിടയിലും ആവേശം കൂടുതലാണ്. നിരവധി ഫാൻസ് ഷോകളാണ് ഒരുക്കിയിട്ടുള്ളത്. തിരുവനന്തപുരം ജില്ലയിൽ മാത്രം ഏഴ് ഷോകളാണുള്ളത്. എന്നാൽ ഏഴ് ഷോകളിൽ നാലെണ്ണവും ഇപ്പോൾ ഹൗസ്ഫുൾ ആയിരിക്കുകയാണ്. കൂടാതെ രണ്ടിടങ്ങളിൽ സീറ്റുകൾ ഫാസ്റ്റ്ഫില്ലിങ്ങാണ്.
രണ്ടു മണിക്കൂർ ഏഴ് മിനിറ്റുമാണ് മലൈക്കോട്ടൈ വാലിബന്റെ ദൈർഘ്യം. ചിത്രത്തിന്റെ ടീസറിനും, ഗാനത്തിനുമെല്ലാം ആരാധകർക്കിടയിൽ മികച്ച സ്വീകാര്യതയാണ് ലഭിച്ചിട്ടുള്ളത്. മോഹൻലാലിനൊപ്പം സൊണാലി കുൽക്കർണി, ഹരീഷ് പേരടി, കഥ നന്ദി, മണിക്ഠൻ ആചാരി എന്നിവരും ചിത്രത്തിൽ വേഷമിടുന്നുണ്ട്.
