ഹരിഹരൻ സംവിധാനം ചെയ്ത നീലത്താമര എന്ന ചിത്രത്തിലൂടെ മലയാള സിനിമാ രംഗത്തെത്തിയ നടനാണ് കൈലാഷ്. നായകനായി അധികകാലം തിളങ്ങാനായില്ലെങ്കിലും സഹനടനായും വില്ലനായും ഡബ്ബിംഗ് ആർട്ടിസ്റ്റായുമെല്ലാം താരം സജീവമാണ്.
അടുത്തിടെ കൈലാഷ് നൽകിയ ഒരു അഭിമുഖം വളരെ വിവാദമായിരുന്നു. ഒരു ഓൺലൈൻ ചാനലിന് നൽകിയ അഭിമുഖത്തിൽ അവതാരകയുടെ ചോദ്യങ്ങൾക്ക് വളരെ മോശമായാണ് കൈലാഷ് മറുപടി നൽകിയത്. ഈ സംഭവത്തിൽ കൈലാഷിന് നിറയെ ട്രോളുകളും വൻ തോതിൽ വിമർശനങ്ങളും നേരിടേണ്ടി വന്നു. ഇപ്പോഴിതാ സംഭവത്തിൽ പ്രതികരണവുമായി രംഗത്തെത്തിയിരിക്കുകയാണ് നടൻ. വേണമെന്ന് കരുതിയല്ല താൻ അവതാരകയോട് അത്തരത്തിൽ പെരുമാറിയത്. അങ്ങനെ സംഭവിച്ച് പോയതാണെന്നും കൈലാഷ് പറയുന്നു.
‘ അവതാരകയോട് മോശമായി പെരുമാറിയ സംഭവത്തെ ഞാൻ ന്യായീകരിക്കുകയല്ല. സിനിമയിൽ വന്നതിന് ശേഷം ഞാൻ 13 അഭിമുഖങ്ങൾ നൽകിയിട്ടുണ്ട്. എന്നാൽ ഇത്രയും കാലത്തിനിടെ എന്റെ ഒരു അഭിമുഖം മാത്രമാണ് ശ്രദ്ധേയമായത്. ഇത്രയും കാലം ഞാൻ നൽകിയ അഭിമുഖങ്ങളിൽ നിന്ന് വ്യത്യസ്തമായി ഒരെണ്ണം ചെയ്യാം, എന്നൊന്നും കരുതിയല്ല ഞാൻ മോശമായി പെരുമാറിയത്. അപ്പോൾ അങ്ങനെ സംഭവിച്ച് പോയതാണ്.
പിന്നീട് പരിപാടി കണ്ടപ്പോൾ എനിക്കും തോന്നി, അത്തരത്തിൽ പെരുമാറാൻ പാടില്ലായിരുന്നെന്ന്. ആ സംഭവത്തിന് ശേഷം എനിക്ക് ഒരുപാട് ട്രോളും ചീത്തവിളികളും കേൾക്കേണ്ടി വന്നു. എല്ലാവരും എന്നെ ഒരുപാട് ശിക്ഷിച്ചു. എല്ലാവരോടും നന്ദിയുണ്ട്. അത്രമാത്രമേ ഈ സംഭവത്തിൽ എനിക്ക് പറയാനുള്ളു.
നടനാകാണമെന്ന് ആഗ്രഹിച്ച് വളരെ കഷ്ടപ്പെട്ടാണ് ഞാൻ സിനിമയിൽ എത്തിയത്. അതുകൊണ്ടുതന്നെ ഈ ഫീൽഡിൽ പിടിച്ചു നിൽക്കാൻ എത്ര പാടാണെന്ന് എനിക്കറിയാം. കുറച്ച് പണം സമ്പാദിക്കണം, പ്രശസ്തി നേടണം എന്നത് മാത്രമല്ല എന്റെ ആഗ്രഹം. സിനിമയോട് എനിക്ക് അതിനുമപ്പുറത്തേയ്‌ക്ക് ഒരു ഇഷ്ടമുണ്ട്. പിന്നെ, എന്നെ വച്ച് ട്രോളുന്നവരും ഞാൻ കാരണം ജീവിച്ചു പോകുന്നുണ്ടല്ലോ- കൈലാഷ് പറഞ്ഞു.
