ന്യൂഡൽഹി: വിനോദസഞ്ചാര മേഖലയിൽ ലക്ഷദ്വീപിനുള്ളത് വൻസാദ്ധ്യതകളാണെന്ന് കേന്ദ്ര ടൂറിസം വകുപ്പ് മന്ത്രി ജി കൃഷ്ണ റെഡ്ഡി. ലക്ഷ്യദ്വീപിലെത്തിയെ പ്രധാനമന്ത്രിയുടെ ചിത്രങ്ങൾ ആഗോള തലത്തിൽ തന്നെ ശ്രദ്ധേയമായിരുന്നു ഇതിന് പിന്നാലെ മാദ്ധ്യമങ്ങളോട് പ്രതികരിക്കുകയായിരുന്നു അദ്ദേഹം.
ഭാവിയിൽ ലക്ഷദ്വീപ് വളരെ പ്രധാനപ്പെട്ട വിനോദസഞ്ചാര കേന്ദ്രമാകും. അവിടെ വിമാനത്താവളം കൊണ്ടുവരും, അതിനുവേണ്ടി പ്രവർത്തിക്കുകയാണ് സർക്കാർ. കേരളത്തിൽ നിന്നും ലക്ഷദ്വീപിലേക്ക് ഗതാഗത സൗകര്യമുണ്ട്. ഇനി ആർക്കും ന്യൂസ് ലൻഡിലേക്കോ സ്വിറ്റ്സർലാൻഡിലേക്കോ പോകേണ്ട കാര്യമില്ല. ലക്ഷദ്വീപിൽ തന്നെയുണ്ട് എല്ലാമെന്നും റെഡ്ഡി അഭിപ്രായപ്പെട്ടു.
ജനുവരി 2ന് ലക്ഷദ്വീപ് സന്ദർശിച്ച ശേഷം ദ്വീപ് സമൂഹങ്ങളുടെ ഫോട്ടോകൾ പ്രധാനമന്ത്രി എക്സിൽ പോസ്റ്റ് ചെയ്തിരുന്നു. എറെ ആകർഷകമായ വെളുത്ത തീരങ്ങളും മനോഹരമായ നീലാകാശവും സമൂഹമാദ്ധ്യമങ്ങളിൽ ഏറെ ശ്രദ്ധിക്കപ്പെട്ടു. ലക്ഷക്കണക്കിന് പേരാണ് സമൂഹമാദ്ധ്യമങ്ങളിൽ ചിത്രങ്ങൾ പങ്കുവച്ചത്. കഴിഞ്ഞ രണ്ട് ദിവങ്ങളിൽ ഗൂഗിളിൽ ഏറ്റവും അധികം തിരഞ്ഞ കീ വേർഡും ലക്ഷദ്വീപിന്റേതാണ്. അരലക്ഷത്തിലധികം പേരാണ് ലക്ഷദ്വീപിനെ കുറിച്ച് തിരഞ്ഞത്.