രാജ്യമെമ്പാടും ആരാധകരുള്ള ഒരു യൂട്യൂബ് ചാനലാണ് ‘വില്ലേജ് കുക്കിംഗ് ചാനൽ’. തമിഴ്നാട് സ്വദേശികളായ ആറ് പാചകക്കാരാണ് ഈ ചാനൽ നടത്തുന്നത്. അവതരണ രീതിയിലെ വ്യത്യസ്തത കൊണ്ടുതന്നെയാണ് ഇവർ എപ്പോഴും ശ്രദ്ധനേടുന്നത്. ലോകേഷ് കനകരാജ് സംവിധാനം ചെയ്ത വിക്രം എന്ന ചിത്രത്തിലും സംഘം അഭിനയിച്ചിരുന്നു. ഇപ്പോഴിതാ ആ സിനിമയിൽ അഭിനയിക്കാനായി ഒരു രൂപ പോലും പ്രതിഫലം വാങ്ങിയിട്ടില്ലെന്ന കാര്യം വെളിപ്പെടുത്തിയിരിക്കുകയാണ് സംഘം. ചെന്നൈയിൽ നടന്ന ഒരു പൊതുപരിപാടിയിലാണ് ചാനലിലെ അംഗമായ വി അയ്യനാർ ഇക്കാര്യം വെളിപ്പെടുത്തിയത്.
#Watch | “விக்ரம் படத்துல நடிச்சதுக்கு ஒரு ரூபாய் கூட வாங்கல..”#SunNews | #VillageCookingChannel | #TNGIM2024 pic.twitter.com/Vvgz9nDKV5
— Sun News (@sunnewstamil) January 8, 2024
‘ ഞങ്ങളുടെ ചാനൽ ജനങ്ങൾ ഏറ്റെടുത്തപ്പോൾ തന്നെ തീരുമാനിച്ച കാര്യമാണ് പരസ്യങ്ങൾക്കും മറ്റുമായി ഒരു രൂപപോലും പ്രതിഫലം വാങ്ങിക്കില്ലെന്ന്. ഇക്കാര്യങ്ങളെല്ലാം ഞങ്ങൾ ഇപ്പോഴും പിന്തുടരുന്നുണ്ട്. പണത്തിനോട് താൽപര്യം കാണിച്ച് ഞങ്ങൾ ഇതുവരെ ഒന്നും ചെയ്തിട്ടില്ല. വിക്രം എന്ന സിനിമയിൽ അഭിനയിച്ചപ്പോഴും ഞങ്ങൾ പ്രതിഫലം വാങ്ങിയിരുന്നില്ല. നിരവധി പരസ്യ ചിത്രങ്ങളിലേയ്‌ക്ക് ഞങ്ങൾക്ക് അവസരം ലഭിച്ചിരുന്നു. ഇതിൽ ഒരു ചോക്ലേറ്റിന്റെ പരസ്യത്തിൽ അഭിനയിക്കാനായി ഞങ്ങൾക്ക് നാല് ലക്ഷം രൂപ വാഗ്ദാനം ചെയ്തിരുന്നു. എന്നാൽ അത് ഞങ്ങൾ വേണ്ടെന്ന് വെക്കുകയായിരുന്നു.
10 സെക്കൻഡ് പരസ്യത്തിലാണ് അഭിനയിക്കാൻ അവസരം ലഭിച്ചത്. ഞങ്ങളെ സ്നേഹിക്കുന്ന ജനങ്ങളും ആ പരസ്യം കാണണം എന്ന് ആഗ്രഹിച്ച് തന്നെയാണ് പരസ്യകമ്പനി ഞങ്ങളെ സമീപിച്ചത്. എന്നാൽ അത്തരം പരസ്യങ്ങളിൽ അഭിനയിച്ച് ഈ സാധനം നിങ്ങൾ വാങ്ങിക്കണമെന്ന് ജനങ്ങളോട് അഭ്യർത്ഥിക്കാൻ ഞങ്ങൾക്ക് മനസ് വരാറില്ല. ഞങ്ങൾക്ക് യൂട്യൂബിൽ നിന്ന് ലഭിക്കുന്ന വരുമാനം മാത്രം മതി’. എന്നായിരുന്നു വി അയ്യനാറിന്റെ വാക്കുകൾ.
