വിഷ്ണു വിശാൽ, വിക്രാന്ത് സന്തോഷ് എന്നിവർക്കൊപ്പം രജനികാന്ത് അതിഥി വേഷത്തിലെത്തുന്ന ലാൽസലാം ഫെബ്രുവരി 9- ന് തീയേറ്ററുകളിൽ എത്തും. സമൂഹമാദ്ധ്യമങ്ങളിലൂടെ ലൈക പ്രൊഡക്ഷനാണ് ഇക്കാര്യം അറിയിച്ചിരിക്കുന്നത്. ചിത്രത്തിൽ മൊയ്തിൻ ഭായ് എന്ന വേഷത്തിലാണ് രജനി എത്തുന്നത്.
ചിത്രത്തിന്റെ തിരക്കഥയും സംവിധാനവും ഐശ്വര്യ രജനികാന്താണ്. ലൈക്ക പ്രൊഡക്ഷൻസിന്റെ ബാനറിൽ സുബാസ്ക്കരനാണ് ലാൽ സലാം നിർമ്മിക്കുന്നത്. എ.ആർ റഹ്മാന്റെ സംഗീതത്തിലൊരുങ്ങുന്ന ചിത്രത്തിന്റെ ഛായാഗ്രഹണം രംഗസാമിയാണ്.
ചിത്രം പൊങ്കൽ റിലീസ് ചെയ്യുമെന്നാണ് ആദ്യം പറഞ്ഞിരുന്നത്. എന്നാൽ, പിന്നീട് തീയതി മാറ്റുകയായിരുന്നു. രജനികാന്തിനും വിഷ്ണു വിശാലിനും വിക്രാന്തിനും പുറമെ സെന്തിൽ, ജീവിത , തമ്പി രാമയ്യ, അനന്തിക സനിൽകുമാർ, വിവേക് പ്രസന്ന, തങ്കദുരൈ തുടങ്ങിയവരാണ് മറ്റു വേഷങ്ങൾ ചെയ്യുന്നത്.
