ന്യൂഡൽഹി: രാഹുൽ ഗാന്ധിയുടെ നേതൃത്വത്തിൽ കോൺഗ്രസ് പാർട്ടി നടത്താനിരിക്കുന്ന ഭാരത് ജോഡോ ന്യായ് യാത്രയെ പരിഹസിച്ച് ബിജെപി ദേശീയ അദ്ധ്യക്ഷൻ ജെ പി നദ്ദ. കോൺഗ്രസ് നടത്താൻ പോകുന്നത് ‘ഭാരത് തോഡോ അന്യായ് യാത്ര’യാണെന്നായിരുന്നു നദ്ദയുടെ പരിഹാസം. ഈ മാസം 14ന് ഇംഫാലിൽ നിന്ന് ഭാരത് ജോഡോ ന്യായ് യാത്രയ്‌ക്ക് തുടക്കം കുറിക്കുമെന്നാണ് കോൺഗ്രസ് അറിയിച്ചിരിക്കുന്നത്.” ഈ രാജ്യത്തിന്റെ അടിത്തറ തകർക്കാൻ ശ്രമിച്ച കോൺഗ്രസ് ഇപ്പോൾ ഭാരത് ജോഡോ എന്ന പേരിൽ യാത്ര നടത്തുവെന്നത് അങ്ങേയറ്റം വിചിത്രമാണ്. ഇത് ഭാരത് തോഡോ അന്യായ് യാത്ര ആണെന്നാണ് തനിക്ക് തോന്നുന്നതെന്നും നദ്ദ പറയുന്നു. ഗുവാഹത്തിയിൽ നടന്ന ബിജെപി സംസ്ഥാന എക്സിക്യൂട്ടീവ് യോഗത്തിൽ സംസാരിക്കുകയായിരുന്നു അദ്ദേഹം.
” ഒരു സർക്കാരിനെ നടത്തിക്കൊണ്ടു പോകുന്നതിൽ മാത്രമല്ല, പ്രതിപക്ഷത്ത് ഇരിക്കാൻ പോലും കോൺഗ്രസ് യോഗ്യരല്ലെന്നാണ് എനിക്ക് തോന്നിയിട്ടുണ്ട്. ഇപ്പോൾ കോൺഗ്രസ് ഭാഗമായിട്ടുള്ള ഇൻഡി മുന്നണിക്ക് രണ്ട് ലക്ഷ്യങ്ങളാണ് ഉള്ളത്. ഒന്ന് അവർ അനധികൃതമായി സമ്പാദിച്ച സ്വത്തുക്കളുടെ സംരക്ഷണവും മറ്റൊന്ന് അവരുടെ കുടുംബത്തിന്റെ സംരക്ഷണവും.
പ്രധാനമന്ത്രി നരേന്ദ്രമോദിയുടെ നേതൃത്വത്തിൽ കഴിഞ്ഞ 10 വർഷമായി അസമിലും വടക്കു കിഴക്കൻ സംസ്ഥാനങ്ങളിലും വലിയ തോതിൽ വികസന പ്രവർത്തനങ്ങൾ നടത്തി വരുന്നുണ്ട്. കേന്ദ്രത്തിൽ ബിജെപി അധികാരത്തിൽ വന്നതിന് ശേഷമാണ് വടക്കു കിഴക്കൻ സംസ്ഥാനങ്ങളിൽ മെച്ചപ്പെട്ട സ്ഥിതി ഉണ്ടായത്. വരാനിരിക്കുന്ന ലോക്‌സഭാ തിരഞ്ഞെടുപ്പിൽ മറ്റൊരു വിജയം കൂടി ഉറപ്പാക്കാൻ പാർട്ടി പ്രവർത്തകർ ആത്മാർത്ഥമായി പ്രവർത്തിക്കണമെന്നും അദ്ദേഹം ആവശ്യപ്പെട്ടു.
