ഫാസ്റ്റ് ഫുഡുകൾക്ക് പുറകെ പായുന്ന പുതു തലമുറയ്ക്ക് താളും ചേമ്പുമെല്ലാം ഭക്ഷ്യവസ്തുക്കളാണെന്ന കാര്യം പോലും ചിലപ്പോൾ അറിയുകയുണ്ടാവില്ല. തോടിന്റെ വക്കിലും പാടവരമ്പുകളിലും തഴച്ചു വളരുന്ന താളിനെ പൊതുവെ ആരും ശ്രദ്ധിക്കാറില്ല. മഴക്കാലത്ത് താളിന്റെ ഇലകളിൽ തുള്ളി തുള്ളികളായി മഴത്തുള്ളികൾ നിൽക്കുന്നത് കാണാൻ പ്രത്യേക രസമാണ്. ഇതൊക്കെയാണെങ്കിലും തേങ്ങ പത്ത് അരച്ചാലും താളല്ലേ കറിയെന്നും, ചൊറിയൻ ചേമ്പെന്നും പറഞ്ഞ് മാറ്റി താളിനെ മാറ്റി നിർത്തുകയാണ് നാം അധികവും ചെയ്യുന്നത്. പഴമക്കാരുടെ ആരോഗ്യ രഹസ്യങ്ങളിലൊന്നായ താളിന്റെ ഗുണങ്ങൾ അനവധിയാണ്. മാറ്റി നിർത്തപ്പെടേണ്ടവനല്ല ചേമ്പിന്റെ തളിരിലയെന്ന് ഇനിയെങ്കിലും അറിഞ്ഞോളൂ..
ചേമ്പിന്റെ തളിരിലയെയാണ് താളെന്ന് വിളിക്കുന്നത്. പ്രോട്ടീൻ, ഫൈബർ, കാത്സ്യം, പൊട്ടാസ്യം, കോപ്പർ, മാംഗനീസ്, ഫോസ്ഫറസ് തുടങ്ങി ധാരാളം പോഷക ഘടങ്ങളാണ് താളിൽ അടങ്ങിയിട്ടുള്ളത്. ദഹനപ്രശ്നങ്ങൾ ഒഴിവാക്കി കുടലിന്റെ ആരോഗ്യം മെച്ചപ്പെടുത്താൻ ഏറെ സഹായിക്കുന്ന താള് കറിയായും തോരനായും കഴിക്കാം. കാഴ്ച ശക്തി വർദ്ധിപ്പിക്കുന്നതിൽ പ്രധാന ഘടകമായ വിറ്റാമിൻ എ പോലുള്ള വിറ്റാമിനുകൾ ഇതിൽ അടങ്ങിയിട്ടുണ്ട്. താളിലുള്ള പൊട്ടാസ്യം രക്തസമ്മർദ്ദം നിയന്ത്രിച്ച് നിർത്താൻ സഹായിക്കുന്നു. തളർച്ചയും ക്ഷീണവും സ്ഥിരമായിയുള്ളവർ ഭക്ഷണത്തിൽ ഉൾപ്പെടുത്തേണ്ട പ്രധാന ആഹാരങ്ങളിൽ ഒന്നാണ് താളില. ഇതിൽ അയൺ ധാരാളം അടങ്ങിയിട്ടുള്ളതിനാൽ ഹീമോഗ്ലോബിന്റെ ഉത്പാദനത്തിനും സഹായിക്കുന്നു.
