ആയുർവേദത്തിൽ ഏറെ പ്രാധാന്യമുള്ള ഒന്നാണ് രാമച്ചം. വേനൽക്കാലത്ത് ശരീരത്തിന് തണുപ്പ് കിട്ടുന്നതിനായി ഒഴിച്ചുകൂടാനാവത്ത ഒന്നാണ് രാമച്ചം. ഇതിന്റെ വേരാണ് ഔഷധമായി ഉപയോഗിക്കുന്നത്. കിടക്ക, ചെരുപ്പ്, വിശറി തുടങ്ങിയവയുടെ നിർമ്മാണത്തിനും രാമച്ചം ഉപയോഗിക്കുന്നു. ശരീരത്തിന്റെ ഈർപ്പവും ജലാംശവും നിലനിർത്താൻ രാമച്ചം വളരെ സഹായിക്കുന്നു.
രാമച്ചം ഇട്ട് വെള്ളം തിളപ്പിച്ച് കുടിക്കുന്ന പതിവുള്ളവരാണ് നാം. ഇതിനൊപ്പം തന്നെ രാമച്ചത്തിന്റെ എല്ലാ ഗുണങ്ങളും നൽകുന്നതാണ് രാമച്ച എണ്ണയും. സുഗന്ധം പരത്തുന്ന ഈ എണ്ണ നിരവധി ഗുണങ്ങളാണ് നൽകുന്നത്. പെർഫ്യൂം, സോപ്പ്, മറ്റ് സൗന്ദര്യ വർദ്ധക വസ്തുക്കളുടെ നിർമ്മാണത്തിലും രാമച്ചം വ്യാപകമായി ഉപയോഗിക്കുന്നു. രാമച്ച എണ്ണ ഉപയോഗിക്കുന്നത് വഴി ശരീരത്തിന് ലഭിക്കുന്ന ഗുണങ്ങൾ ഇതാ…
- ശരീരത്തെ തണുപ്പിക്കാൻ കഴിവുള്ള എണ്ണയാണ് രാമച്ച എണ്ണ. സൂര്യഘാതം മൂലമുണ്ടാകുന്ന വീക്കം, നിർജ്ജലീകരണം എന്നിവയെ തടയാൻ ഇതിന് കഴിയും. ആന്റി-ഇൻഫ്ലേറ്ററി ഗുണങ്ങൾക്ക് പേരുകേട്ടതാണ് രാമച്ച എണ്ണ. വെള്ളയ്ക്കൊപ്പം ചേർത്ത് നേർപ്പിച്ചതിന് ശേഷം മാത്രമാകണം രാമച്ച എണ്ണ ഉപയോഗിക്കാൻ. വേദനയുള്ള ശരീരഭാഗങ്ങളിൽ ഏതാനും തുള്ളി തേച്ച് മൃദുവായി മസാജ് ചെയ്യുന്നത് മികച്ച ഫലം നൽകും.
- മുറിവ് ഭേദമാക്കാനുള്ള കഴിവ് രാമച്ചത്തിനുണ്ട്. ബാക്ടീരിയ സൃഷ്ടിക്കുന്ന അണുബാധയിൽ നിന്നും വിടുതൽ ലഭിക്കുന്നതിനായി രാമച്ച എണ്ണ ഉപയോഗിക്കാവുന്നതാണ്. കുളിക്കുന്ന വെള്ളത്തിൽ രണ്ട് തുള്ളി എണ്ണ ചേർക്കുന്നത് നല്ലതാണ്. ഒപ്പം സുഗന്ധവും ലഭിക്കും.
- പ്രതിരോധശേഷി മെച്ചപ്പെടുത്താൻ നല്ലതാണ് രാമച്ച എണ്ണ. ആന്റി-ഓക്സിഡന്റുകളാൽ സമ്പന്നമാണ് ഈ എണ്ണ. ശരീരത്തിലെ വിഷാംശങ്ങളെ നീക്കം ചെയ്യാനും ഇത് സഹായിക്കുന്നു. രാമച്ച എണ്ണ ചേർത്ത് ആവി പിടിക്കുന്നത് പ്രതിരോധ ശേഷി മെച്ചപ്പെടുത്താനും അണുബാധകളെ തടയാനും സഹായിക്കുന്നു.
- മുഖക്കുരു സംബന്ധിച്ച പ്രശ്നങ്ങൾക്ക് പരിഹാരം കാണാനും രാമച്ച എണ്ണ സഹായിക്കും. മുഖക്കുരുവിന്റെ വളർച്ചയെ തടയാനും മുഖക്കുരവിന്റെ പാടുകൾ ഇല്ലാതാക്കാനും ഇത് സഹായിക്കുന്നു. ഫേസ് വാഷിൽ രണ്ട് തുള്ളി രാമച്ച എണ്ണ കലർത്തി ഉപയോഗിക്കാവുന്നതാണ്. വെളിച്ചെണ്ണ, ജൊജോബ ഓയിൽ എന്നിവയിൽ കലർത്തിയും ഇത് ഉപയോഗിക്കാം. രാമച്ച എണ്ണ മേൽ പറഞ്ഞ എണ്ണകൾക്കൊപ്പം ചേർത്ത് മസാജ് ചെയ്യുന്നത് ചർമ്മ കോശങ്ങളെ പുനരുജ്ജീവിപ്പിക്കാനും മൃദുവാക്കുന്നതിനും നല്ലതാണ്.
- സമ്മർദ്ദം, ഉത്കണ്ഠ, വിഷാദം തുടങ്ങിയ മാനസിക സംഘർഷത്തിലൂടെയാണ് കടന്നു പോകുന്നതെങ്കിൽ രാമച്ച എണ്ണ ഉപയോഗിക്കാം. കൈത്തണ്ട, നെഞ്ച്, കഴുത്ത് എന്നിവിടങ്ങളിൽ രണ്ടോ മൂന്നോ തുള്ളി പുരട്ടി മസാജ് ചെയ്യാവുന്നതാണ്.
ശ്രദ്ധിക്കുക രാമച്ച എണ്ണ പൊതുവേ സുരക്ഷിതമാണെങ്കിലും വിദഗ്ധരുടെ അഭിപ്രായം ആരാഞ്ഞതിന് ശേഷം ഉപയോഗിക്കുന്നതാകും ഉചിതം.
