സമൂഹ മാദ്ധ്യമങ്ങളിലെ ട്രെൻഡിംഗിൽ ഇപ്പോഴും മുന്നിൽ നിൽക്കുന്ന ഒന്നാണ് ലക്ഷദ്വീപ്. പ്രധാനമന്ത്രിക്കെതിരായും ഭാരതീയർക്കെതിരായും മാലദ്വീപ് മന്ത്രിമാർ നടത്തിയ അധിക്ഷേപ പരാമർശത്തെ തുടർന്ന് മാലദ്വീപിലേക്കുള്ള യാത്രകൾ ഇന്ത്യക്കാർ മാറ്റി നിർത്തിയപ്പോൾ പിന്നീട് നാം തിരഞ്ഞത് ലക്ഷദ്വീപിലെ പ്രകൃതി സൗന്ദര്യമാണ്. ഇതിനോടകം തന്നെ ഒട്ടനവധി മലയാളം സിനിമകളിലൂടെ ലക്ഷദ്വീപിന്റെ പ്രകൃതി സൗന്ദര്യം പ്രേക്ഷകരുടെ മുന്നിലെത്തിയിട്ടുണ്ട്. അത്തരത്തിൽ പവിഴപുറ്റുകളുടെ നാടായ ലക്ഷദ്വീപിന്റെ പ്രകൃതി സൗന്ദര്യം ആവാഹിച്ചെടുത്ത സിനിമകൾ പരിചയപ്പെടാം..
അനാർക്കലി
ലക്ഷദ്വീപിൽ ചിത്രീകരിച്ച സിനികൾ പെട്ടന്നൊന്ന് ഓർക്കാൻ പറഞ്ഞാൽ എല്ലാവരുടെയും മനസിൽ ആദ്യം എത്തുന്നത് പൃഥ്വിരാജ് നായകനായി എത്തിയ അനാർക്കലി എന്ന സിനിമയായിരിക്കും. പ്രണയം ചാലിച്ച ഈ സിനിമയിലെ ബഹുഭൂരിപക്ഷ സീനുകളും ലക്ഷദ്വീപിലാണ് ചിത്രീകരിച്ചത്. ബങ്കാരം, അഗത്തി എന്നീ ദ്വീപുകളിൽ ചിത്രീകരിച്ച ഈ സിനിമ ലക്ഷദ്വീപിന്റെ സൗന്ദര്യവും സംസ്‌കാരവും ജനജീവിതവും തുറന്നുക്കാണിക്കുന്നു.
മോസയിലെ കുതിര മീനുകൾ
ആസിഫ് അലിയും സണ്ണി വെയ്‌നും പ്രധാന വേഷങ്ങളിലെത്തിയ സിനിമയാണ് മോസയിലെ കുതിര മീനുകൾ. അജിത്ത് പിള്ളയുടെ സംവിധാനത്തിൽ പുറത്തിറക്കിയ മോസയിലെ കുതിര മീനുകൾ എന്ന ഈ സിനിമ അനാർക്കലി ചിത്രം പോലെ തന്നെ ലക്ഷദ്വീപിലാണ് കൂടുതലായി ചിത്രീകരിച്ചിരിക്കുന്നത്. ലക്ഷദ്വീപിലെ അണ്ടർവാട്ടർ രംഗങ്ങൾ ചിത്രത്തെ പ്രേക്ഷകരിൽ എത്തിക്കുന്നതിന് നല്ല രീതിയിൽ സ്വാധീനിച്ചിട്ടുണ്ട്.
സിൻജാർ
മൈഥലി, ശ്രീനന്ദ തുടങ്ങിയവരെ കേന്ദ്ര കഥാപാത്രങ്ങളായി ചിത്രീകരിച്ച സിനിമയാണ് സിൻജാർ. ലക്ഷദ്വീപിലെ ജാസരി ഭാഷയിലുള്ള ആദ്യത്തെ സിനിമയാണ് സിൻജാർ. പൂർണമായും ലക്ഷദ്വീപിൽ ചിത്രീകരിക്കപ്പെട്ട ഈ സിനിമയുടെ സംവിധാനം നിർവ്വഹിച്ചത് സന്ദീപ് പാമ്പിള്ളിയാണ്. ഇറാഖിലേക്ക് നഴ്‌സായി പോകുന്ന യുവതികൾ ഐഎസ് ഭീകരുടെ പിടിയിൽ പെടുന്നതും പിന്നീട് രക്ഷപ്പെട്ട് നാട്ടിലെത്തുന്നതുമാണ് ചിത്രത്തിന്റെ കഥ. ലക്ഷദ്വീപിലെ ജനജീവിതം അതുപോലെ ഒപ്പിയെടുക്കാൻ സിനിമയ്‌ക്ക് സാധിച്ചു. രണ്ട് ദേശീയ പുരസ്‌കാരങ്ങളും സിനിമയക്ക് ലഭിച്ചിട്ടുണ്ട്.
മൂത്തോൻ
നിവിൻ പോളിയെ നായകനാക്കി ഗീതുമോഹൻദാസ് സംവിധാനം ചെയ്ത സിനിമയാണ് മൂത്തോൻ. സിനിമയിലെ പ്രധാന ഭാഗങ്ങൾ ചിത്രീകരിച്ചിരിക്കുന്നത് ലക്ഷദ്വീപിലാണ്. ദ്വീപിൽ ശാന്ത ജീവിതം നയിച്ചിരുന്ന അക്ബർ എന്ന ചെറുപ്പക്കാരൻ നേരിടുന്ന വെല്ലുവിളികളാണ് സിനിമയുടെ കഥ.
പ്രണയ മീനുകളുടെ കടൽ
കമൽ സംവിധാനം ചെയ്ത പ്രണയ മീനുകളുടെ കടൽ എന്ന സിനിമയും ചിത്രീകരിച്ചിരിക്കുന്നത് ലക്ഷദ്വീപിലാണ്. കരവത്തി ദ്വീപ സമൂഹത്തിലാണ് ഇത് ചിത്രീകരിച്ചത്. തകർന്നു കിടക്കുന്ന ഉരു നേരാക്കാൻ ലക്ഷദ്വീപിലേക്ക് വരുന്നവരുടെ ജീവിതമാണ് സിനിമയിലൂടെ കാണിക്കുന്നത്. ലക്ഷദ്വീപിലെ കടലിന്റെ ഭംഗിയും, സംസ്‌കാരവും, ഭക്ഷണ രീതിയുമെല്ലാം സിനിമയിലൂടെ തുറന്നുകാണിക്കുന്നുണ്ട്.
