‘അതിരാവിലെ എഴുന്നേറ്റു കഴിഞ്ഞാൽ ഒരു ചായ അല്ലെങ്കിൽ ഒരു കാപ്പി അത് നിർബന്ധാ’ എന്നു പറയുന്നവരായിരിക്കും നമ്മിൽ ബഹുഭൂരിപക്ഷം മലയാളികളും. ചായകുടിയും കാപ്പികുടിയും അവിടെകൊണ്ടും അവസാനിപ്പിക്കുന്നില്ല. ഇടനേരത്ത് ഒരു ചായ, വൈകുന്നരം ഒരു ചായ, രാത്രിയിലും ഒരു ചായ അല്ലെങ്കിൽ കാപ്പി ശീലമാക്കിയവരായിരിക്കും പല ആളുകളും. കൃത്യ സമയങ്ങളിൽ ഈ പാനീയങ്ങൾ കിട്ടിയില്ലെങ്കിൽ തലവേദന അനുഭവപ്പെടുന്നവരും നമ്മുടെ സൗഹൃദവലയങ്ങളിൽ ഉണ്ടായിരിക്കും. എന്നാൽ ഇതിൽ അടങ്ങിയിരിക്കുന്ന കഫീൻ എന്ന ഘടകം അളവിൽ കൂടുതലായാൽ ശരീരത്തിന് ദോഷം ചെയ്യും. നിർജ്ജലീകരണം, അസിഡിറ്റി, ഉറക്കമില്ലായ്മ, ഉത്കണ്ഠ തുടങ്ങിയ പല പ്രശ്നങ്ങളും ഇതുമൂലം ഉണ്ടാകുന്നു. ഈ ചായകുടിയും കാപ്പികുടിയും നിർത്തണമെന്ന് നിങ്ങൾക്ക് ആഗ്രഹമുണ്ടോ? എങ്കിൽ ഈ എളുപ്പ വഴികൾ പരീക്ഷിക്കാം..
ഉറക്കമുണർന്നയുടൻ ചായ കുടിക്കുന്നതിനു പകരം ഒരു ഗ്ലാസ് ചൂടുവെള്ളം കുടിച്ച് തുടങ്ങാം. ഈ ശീലം തുടങ്ങാൻ ആദ്യം ബുദ്ധിമുട്ട് തോന്നുമെങ്കിലും പതിയെ ചായ, കാപ്പി എന്നത് ചെറു ചൂടുവെള്ളത്തിലേക്ക് മാറ്റാൻ ശ്രമിക്കുക. ചായ പ്രേമികൾക്ക് വീട്ടിൽ തന്നെയുണ്ടാക്കാവുന്ന ഹെർബൽ ചായ ഇടനേരത്ത് പരീക്ഷിച്ചു നോക്കാം. കറുവപ്പട്ട, ഗ്രാമ്പു, ഇഞ്ചി, തുളസി തുടങ്ങിയവ ചേർത്ത് തയ്യാറാക്കുന്ന ഹെർബൽ ചായ ശരീരത്തിന് ഉത്തമമാണ്. ചായയിലും കാപ്പിയിലും പഞ്ചസാര ഉപയോഗിക്കുന്നതിനു പകരം ശർക്കര ഉപയോഗിക്കുന്നത് ശരീരത്തിന് നല്ലതാണ്. രാത്രി ചായയോ കാപ്പിയോ കുടിക്കുന്ന ശീലമുണ്ടെങ്കിൽ മഞ്ഞൾപൊടിയിട്ട പാൽ കുടിക്കുന്നതോ, ബദാംപാൽ കുടിക്കുന്നതോ ശീലമാക്കാം. ഇതിനുപുറമെ വീട്ടിൽ തന്നെ തയ്യാറാക്കിയ സൂപ്പ് കുടിക്കുന്നതും ശരീരത്തിന് നല്ലതാണ്.
