മലയാളക്കര ഒന്നടങ്കം കാത്തിരുന്ന വിവാഹമാണ് ഗുരുവായൂരിൽ ഇന്ന് നടന്ന താരപുത്രി ഭാഗ്യയുടെ വിവാഹം. പ്രധാനമന്ത്രി നരേന്ദ്രമോദിയും മലയാള സിനിമാ ലോകത്തെ താരരാജാക്കൻമാരുടെയും അനുഗ്രഹത്തോടെയായിരുന്നു ഭാഗ്യയുടെയും ശ്രേയസിന്റെയും വിവാഹം നടന്നത്.
വിവാഹ ചടങ്ങുകളിൽ നിന്നുള്ള മനോഹരമായ ചിത്രങ്ങൾ പങ്കുവച്ചിരിക്കുകയാണ് സുരേഷ് ഗോപി. സമൂഹമാദ്ധ്യമമായ ഇൻസ്റ്റഗ്രാമിലൂടെയായിരുന്നു അദ്ദേഹം ചിത്രങ്ങൾ പങ്കുവച്ചത്. ”ബഹുമാനപ്പെട്ട പ്രധാനമന്ത്രിയുടെ സാന്നിദ്ധ്യത്തിൽ എന്റെ കുട്ടികളുടെ വിവാഹം നടന്നു. നിങ്ങളുടെ പ്രാർത്ഥനകളും അവർക്കൊപ്പം എപ്പോഴും ഉണ്ടാകണം.” സുരേഷ് ഗോപി കുറിച്ചു.
വിവാഹ ചടങ്ങളുടെ ചിത്രങ്ങൾ അമ്മ രാധികയും പങ്കുവച്ചിരുന്നു. ഫേസ്ബുക്കിലൂടെയാണ് രാധിക ചിത്രങ്ങൾ പങ്കുവച്ചത്. വിവാഹശേഷമുള്ള ശ്രേയസിന്റെയും ഭാഗ്യയുടെയും ചിത്രവും കുടുംബ ചിത്രവുമാണ് രാധിക പങ്കുവച്ചത്.
ഓറഞ്ച് നിറത്തിലുള്ള സാരിയണിഞ്ഞ് അതി സുന്ദരിയായാണ് ഭാഗ്യ വേദിയിലെത്തിയത്. പ്രിയപ്പെട്ടവരുടെ സാന്നിധ്യത്തിൽ ഭാഗ്യയുടെ കഴുത്തിൽ ശ്രേയസ് മിന്നു ചാർത്തി. മോഹൻലാൽ, മമ്മൂട്ടി, ഖുശ്ബു സുന്ദർ, ജയറാം, ദിലീപ്, ബിജു മേനോൻ എന്നിവരുൾപ്പെടെ സിനിമാ മേഖലയിലെ നിരവധി പേർ ചടങ്ങിൽ പങ്കെടുത്തു.
