അയോദ്ധ്യയിൽ നിർമിക്കുന്ന രാമക്ഷേത്രം വെറുമൊരു ക്ഷേത്രമല്ല, അത് വിശ്വാസത്തിന്റെയും സഹിഷ്ണുതയുടെയും സാംസ്കാരിക പൈതൃകത്തിന്റെയും പ്രതീകമാണ്. ഏതൊരു മഹത്തായ നിർമിതിയെയും പോലെ, നിരവധി വ്യക്തികളുടെയും സംഘടനകളുടെയും സമർപ്പണവും വൈദഗ്ധ്യവും കൂടിയാണ് ഭവ്യ മന്ദിരം. ഓരോ ഭാരതീയന്റെയും സ്വപ്നം യാഥാർത്ഥ്യമാക്കാൻ രാവും പകലും കഠിനാദ്ധ്വാനം ചെയ്ത പ്രസ്ഥാനങ്ങൾ എതൊക്കെ, ചുക്കാൻ പിടിച്ച കമ്പനികൾ എതൊക്കെ…അറിയാം
1. ലാർസൻ ആൻഡ് ടൂബ്രോ( എൽ & ടി)
രാമക്ഷേത്ര നിർമാണത്തിൽ പ്രധാന പങ്ക് വഹിച്ചത് ഇന്ത്യയിലെ പ്രമുഖ എഞ്ചിനീയറിംഗ്- ഇൻഫ്രാസ്ട്രക്ചർ കമ്പനിയായ ലാർസൺ ആൻഡ് ടൂബ്രോയാണ്. ഡിസൈൻ മുതൽ മുഴുവൻ പ്രോജക്റ്റിന്റെയും നിർവഹണം കമ്പനിയാണ്. പല സേവനങ്ങളും സൗജന്യമായി സമർപ്പിച്ചാണ് ഇവർ നിർമാണത്തിന്റെ ഭാഗമായത്. 15 വർഷം മുമ്പ് തന്നെ എൽ&ടി ക്ഷേത്ര നിർമാണത്തിന് സന്നദ്ധത അറിയിച്ച് മുന്നോട്ട് വന്നതായി രാമജന്മഭൂമി തീർത്ഥക്ഷേത്ര ട്രസ്റ്റ് ജനറൽ സെക്രട്ടറി ചമ്പത്ത് റായ് പറഞ്ഞിരുന്നു.
2. ടാറ്റ കൺസൾട്ടിംഗ് എഞ്ചിനീയേഴ്സ് ലിമിറ്റഡ്
രാമക്ഷേത്ര നിർമാണത്തിന്റെ മാനേജ്മെന്റ് കൺസൾട്ടന്റായാണ് ടാറ്റ കൺസൾട്ടിംഗ് എഞ്ചിനീയേഴ്സ് പ്രവർത്തിക്കുന്നത്. ക്ഷേത്രത്തിന്റെ നിർമാണം എൽ&ടി നിർവഹിക്കുമ്പോൾ അതിന്റെ പ്രവർത്തനം വിലയിരുത്തുന്നത് ടാറ്റയിൽ നിന്നുള്ള എഞ്ചിനിയറിംഗ് സംഘമാണ്.
മനുഷ്യശേഷി മുതൽ അസംസകൃത വസ്തുക്കൾ വരെ സൂക്ഷ്മമായി ആസൂത്രണം ചെയ്ത് നടപ്പിലാക്കിയത് ഇതിലെ പ്രമുഖരായ എഞ്ചിനിയറിംഗ് സമൂഹമാണ്.
3. സെൻട്രൽ ബിൽഡിംഗ് റിസർച്ച് ഇൻസ്റ്റിറ്റ്യൂട്ട്
അടിസ്ഥാനം നന്നായാൽ നിർമാണം നന്നാകുമെന്നൊരു ചൊല്ലുണ്ട്. ഏതൊരു ഘടനയുടെയും അടിത്തറ അല്ലെങ്കിൽ അടിസ്ഥാനം നിർണ്ണായകമാണ്. രാമക്ഷേത്രത്തെ സംബന്ധിച്ചിടത്തോളം അത് കൂടുതൽ നിർണ്ണായകമാണ്. നൂറ്റാണ്ടുകളോളം ക്ഷേത്രത്തിന്റെ സ്ഥിരത ഉറപ്പാക്കാൻ സമഗ്രമായ മണ്ണ് പരിശോധനയും വിശകലനവും നടത്തിയത് സെൻട്രൽ ബിൽഡിംഗ് റിസർച്ച് ഇൻസ്റ്റിറ്റ്യൂട്ടാണ് (സിബിആർഐ). 2020 ന്റെ തുടക്കം മുതൽ നിർമാണത്തിൽ സജീവ പങ്കാളിത്തമാണ് ഇവർ വഹിക്കുന്നത്.
a) പ്രധാന ക്ഷേത്രത്തിന്റെ ഘടനാപരമായ രൂപകൽപ്പന
b) രാമനവമിയിൽ രാംലല്ലയുടെ വിഗ്രഹത്തിന്റെ തിരുനെറ്റിയിൽ സൂര്യരശ്മി പതിക്കുന്ന സൂര്യ തിലക് പ്രക്രിയയുടെ ഡിസൈനിംഗ്
c) ക്ഷേത്ര അടിത്തറയുടെ സൂക്ഷമായ വിശകലനം
4. നാഷണൽ ജിയോഫിസിക്കൽ റിസർച്ച് ഇൻസ്റ്റിറ്റ്യൂട്ട്
പ്രദേശത്തിന്റെ ഭൂമിശാസ്ത്രപരമായ ഘടന മനസ്സിലാക്കുന്നതിൽ നാഷണൽ ജിയോഫിസിക്കൽ റിസർച്ച് ഇൻസ്റ്റിറ്റ്യൂട്ട് പ്രധാന പങ്കാണ് വഹിച്ചത്. നൂതന ജിയോഫിസിക്കൽ ടെക്നിക്കുകൾ ഉപയോഗിച്ചാണ് അവർ ഭൂഗർഭ പാളികളിൽ പഠനം നടത്തിയത്.
5. ഗുവാഹത്തി, മദ്രാസ് ഐഐടികൾ
ബോംബെ, ഗുവാഹത്തി, മദ്രാസ് ഐഐടികളും ക്ഷേത്ര നിർമാണത്തിന്റെ ഭാഗമായി പ്രവർത്തിച്ചിരുന്നു. സ്ട്രാക്ചറൽ എഞ്ചിനീയറിംഗ്, ഭൂകമ്പത്തെ പ്രതിരോധിക്കുന്ന ഡിസൈൻ എന്നിവയിൽ അവരുടെ വൈദഗ്ധ്യം ഉപയോഗപ്പെടുത്തി. പരമ്പരാഗത വാസ്തുവിദ്യയും അത്യാധുനിക സാങ്കേതികവിദ്യയുടെയും സംയോജനമാണ് ക്ഷേത്ര ഘടന .
വൈദഗ്ദ്ധ്യമുള്ള വ്യക്തികളുടെ കൂട്ടായ പരിശ്രമത്തിന്റെ ഫലമാണ് യഥാർത്ഥത്തിൽ രാമക്ഷേത്ര നിർമിതി. കരകൗശല വിദഗ്ധർ, കരകൗശല തൊഴിലാളികൾ, എഞ്ചിനീയർമാർ എന്നിവരുടെ ആത്മസമർപ്പണവും ഇവിടത്തെ ഒരോ കല്ലിലും പ്രകടമാണ്.
