മലയാളികളുടെ പ്രിയതാരങ്ങളാണ് ഗോവിന്ദ് പത്മസൂര്യയും ഗോപിക അനിലും. വളരെ സർപ്രൈസായാണ് ഇരുവരുടെയും വിവാഹ നിശ്ചയ വാർത്ത എത്തിയത്. ഇപ്പോഴിതാ വിവാഹ വിശേഷങ്ങൾ പങ്കുവച്ചിരിക്കുകയാണ് ജിപി. തന്റെ യൂട്യൂബ് ചാനലിലൂടെയാണ് താരം വിവാഹ ഒരുക്കങ്ങളെ പറ്റി ആരാധകരോട് പറഞ്ഞിരിക്കുന്നത്.
ഇരുവരുടെയും വിവാഹം ജനുവരി 28 ന് നടക്കും. ഒപ്പം ആരാധകർക്കായി ‘GpzGopz’, ‘GG Celebrations’എന്നീ ഹാഷ് ടാഗുകളും താരം വീഡിയോയിലൂടെ പങ്കുവച്ചു. വിവാഹ തിരക്കുകൾക്കിടിയിലെ ചില മനോഹര നിമിഷങ്ങളും താരം വീഡിയോയിൽ ഉൾപ്പെടുത്തിയിട്ടുണ്ട്. ‘തന്റെ സിനിമാ തിരക്കുകളെല്ലാം മാറ്റി വച്ച് കല്യാണത്തിന്റെ തിരക്കുകൾ ആസ്വദിക്കുകയാണ്. എന്നാൽ ഗോപിക സീരിയലിന്റെ തിരക്കിലാണ്. എല്ലാവരുടേയും അനുഗ്രഹവും പ്രാർത്ഥനയും സപ്പോർട്ടും തങ്ങൾക്ക് വേണമെന്നും ജിപി പറയുന്നു’.
വിവാഹ നിശ്ചയത്തിന് ശേഷം ഇരുവരും ഒരുമിച്ചുള്ള യൂട്യൂബ് വീഡിയോകൾ ആരാധകർക്ക് ഏറെ പ്രിയപ്പെട്ടവയാണ്. വിവാഹ നിശ്ചയത്തിന്റെയും ആദ്യ കൂടിക്കാഴ്ചയെ കുറിച്ചുള്ള വിശേഷങ്ങളും ഇരുവരും പങ്കുവച്ചിരുന്നു. നടനായും അവതാരകനയും മലയാളികൾക്ക് പ്രിയപ്പെട്ട താരമാണ് ജിപി. ടെലിവിഷൻ പരമ്പരകളിലൂടെയാണ് ഗോപിക ശ്രദ്ധേയയായത്.