ന്യൂഡൽഹി: ബ്രഹ്‌മോസ് മിസൈൽ കയറ്റുമതി ചെയ്യാൻ ഭാരതം ഒരുങ്ങി. മാർച്ച് മാസത്തോടെ ഫിലിപ്പെൻസിലേക്ക് മിസൈൽ കയറ്റുമതി ചെയ്യുമെന്ന് ഡിആർഡിഒ ചെയർമാൻ സമീർ വി കാമത്ത് അറിയിച്ചു.
ബ്രഹ്‌മോസ് സൂപ്പർസോണിക് ക്രൂയിസ് മിസൈലുകൾക്കായി രൂപകൽപ്പന ചെയ്ത വിക്ഷേപണ സാമഗ്രികളുടെ കയറ്റുമതി പത്ത് ദിവസത്തിനുള്ളിൽ ആരംഭിക്കും. മാർച്ച് മാസത്തോടെ മിസൈലുകൾ മറ്റ് രാജ്യങ്ങളിലേക്ക് അയക്കുമെന്നും അദ്ദേഹം വ്യക്തമാക്കി. അന്തർവാഹിനികൾ, കപ്പലുകൾ, യുദ്ധവിമാനങ്ങൾ എന്നിവയിൽ നിന്ന് വിക്ഷേപിക്കാവുന്ന ഒരു ഇടത്തരം സൂപ്പർസോണിക് ക്രൂയിസ് മിസൈലാണ് ബ്രഹ്‌മോസ്.
ഏകദേശം 4.94 ലക്ഷം കോടി രൂപയുടെ ഡിആർഡിഒ ഉൽപ്പന്നങ്ങൾക്ക് ആഗോള ഓർഡറുകൾ ലഭിച്ചിട്ടുണ്ടെന്ന് സമീർ വി കാമത്ത് പറഞ്ഞു. കഴിഞ്ഞ 5 വർഷം കൊണ്ട് പ്രതിരോധ സാമഗ്രികളുടെ കയറ്റുമതിയിൽ രാജ്യം അതിവേഗം മുന്നേറുകയാണ്. കഴിഞ്ഞ അഞ്ച് വർഷത്തിലായിരുന്നു മൊത്തം കയറ്റുമതിയുടെ 70 ശതമാനവും നടന്നത്.
തദ്ദേശീയമായി വികസിപ്പിച്ച ആകാശ് മിസൈലുകൾ, അർജുൻ ടാങ്കുകൾ അടക്കമുള്ള വിവിധ പ്രതിരോധ സാമഗ്രികളുടെ കയറ്റുമതിയും രണ്ട് വർഷത്തിനുള്ളിൽ ആരംഭിക്കും. പല രാജ്യങ്ങളും ഇവ വാങ്ങാൻ താൽപര്യം അറിയിച്ചിട്ടുണ്ട്. അർമേനിയ പോലുള്ള രാജ്യങ്ങൾക്ക് ഇന്ത്യ ഇതിനകം തന്നെ ആയുധങ്ങൾ നൽകുന്നുണ്ട്. സ്വന്തം ആവശ്യങ്ങൾക്ക് പോലും ഇറക്കുമതി ചെയ്തിരുന്ന ഇന്ത്യയുടെ പ്രതിരോധ മേഖലയ്‌ക്ക് ഇതൊരു വലിയ കുതിച്ചുചാട്ടമാണെന്നും അദ്ദേഹം ചൂണ്ടിക്കാട്ടി.
2023-ലും പ്രതിരോധ കയറ്റുമതിയിൽ ഇന്ത്യ ചരിത്രം സൃഷ്ടിച്ചിരുന്നു. ഏകദേശം 16,000 കോടി രൂപയുടെ ആയുധങ്ങളാണ് ഇന്ത്യ ലോക രാജ്യങ്ങൾക്ക് വിറ്റത്. 2022ൽ 13,000 കോടി രൂപയുടെ ആയുധ ഇടപാടിനാണ് ഒപ്പുവെച്ചത്. പ്രതിരോധ ഉൽപ്പാദന മേഖലയിലും വൻ കുതിച്ചു ചാട്ടമാണുണ്ടായത്. ഒരു ലക്ഷം കോടി രൂപയുടെ ഉൽപ്പാദനമാണ് ഈ മേഖലയിൽ മാത്രം നടന്നത്.
