ന്യൂഡൽഹി: രാജ്യത്തെ യുവവോട്ടർമാരോട് സമ്മതിദാന അവകാശത്തിന്റെ പ്രധാന്യം വ്യക്തമാക്കി പ്രധാനമന്ത്രി നരേന്ദ്രമോദി. സ്വാതന്ത്രത്തിന്റെ 100-ാം വാർഷികം ആഘോഷിക്കുന്ന 2047-ൽ രാജ്യം വികസിത രാജ്യമായി മാറാനുള്ള തയ്യാറെടുപ്പിലാണ്. നിങ്ങളുടെ വോട്ടുകളാണ് രാജ്യത്തെ മുന്നോട്ട് നയിക്കുന്നത്. ബഹിരാകാശം, പ്രതിരോധം, ഉത്പാദനം, സാങ്കേതികവിദ്യ, കണ്ടുപിടുത്തങ്ങൾ തുടങ്ങി നിരവധി മേഖലകളിലെ രാജ്യത്തിന്റെ കുതിപ്പ് യുവാക്കളെ ആശ്രയിച്ചാണ്. യുവാക്കളുടെ ഓരോ വോട്ടുകളും രാജ്യത്തിന്റെ വികസനത്തിന്റെ ദിശയും പരസ്പരം ബന്ധപ്പെട്ടിരിക്കുന്നുവെന്നും പ്രധാനമന്ത്രി കൂട്ടിച്ചേർത്തു. നമോ നവമത്ദാതാ സമ്മേളനത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
‘ലോക്സഭാ തിരഞ്ഞെടുപ്പിലെ നിങ്ങളുടെ സമ്മതിദാനാവകാശം ഇന്ത്യയെ ലോകത്തിലെ മൂന്നാമത്തെ വലിയ സമ്പദ് വ്യവസ്ഥയാക്കും. നിങ്ങളുടെ വോട്ട് സുസ്ഥിരമായ രാജ്യത്തെയും ഡിജിറ്റൽ രംഗത്തെയും പടുത്തുയർത്തും. രാജ്യം അഭിമുഖീകരിച്ചു കൊണ്ടിരുന്ന പ്രശ്നങ്ങളെല്ലാം നിലവിലെ സർക്കാർ പരിഹരിച്ചു. പ്രകൃതിയെ സംരക്ഷിച്ചുകൊണ്ട് എങ്ങനെ വികസനം നടത്താമെന്ന് ഇന്ത്യ ഇന്ന് ലോകത്തിന് കാണിച്ചുകൊടുക്കുകയാണ്. രാജ്യത്തിന്റെ അടിസ്ഥാന സൗകര്യ വികസനങ്ങളിലുൾപ്പെടെ മാറ്റങ്ങൾ പ്രകടമാണെന്നും അദ്ദേഹം പറഞ്ഞു.
യുവാക്കളിലാണ് രാജ്യത്തിന്റെ പ്രതീക്ഷ. സ്റ്റാർട്ട് അപ്പ് നയത്തിലൂടെ യുവാക്കളെ ബിസിനസിലേക്ക് നയിക്കാനാണ് കേന്ദ്രസർക്കാർ ലക്ഷ്യമിടുന്നത്. കുടുംബവാഴ്ചയിലൂടെ രാജ്യത്തെ തകർക്കുന്ന പാർട്ടികളെ തിരഞ്ഞെടുപ്പിൽ പരാജയപ്പെടുത്താനും യുവാക്കളോട് പ്രധാനമന്ത്രി ആഹ്വാനം ചെയ്തു.
