സിനിമാ പ്രേമികൾ വളരെ ആകാംക്ഷയോടെ കാത്തിരിക്കുന്ന മമ്മൂട്ടി ചിത്രമാണ് ഭ്രമയുഗം. ഭൂതകാലത്തിന് ശേഷം രാഹുൽ സദാശിവൻ സംവിധാനം ചെയ്യുന്ന ഒരു ഹൊറർ ചിത്രത്തിൽ പ്രതിനായകനായി മമ്മൂട്ടി വേഷമിടുന്നു എന്നത് തന്നെയാണ് പ്രേക്ഷകരെ ഭ്രമയുഗത്തിലേയ്ക്ക് ആകർഷിക്കുന്നത്. വ്യത്യസ്ത രൂപ-ഭാവ വേഷ പകർച്ചകളിലൂടെ ഞെട്ടിക്കുന്ന മഹാനടന്റെ മറ്റൊരു പകർന്നാട്ടമായിരിക്കും ഭ്രമയുഗത്തിലേതെന്ന് ഉറപ്പ് നൽകുന്നതായിരുന്നു പുറത്തുവന്ന ടീസറും പോസ്റ്ററുകളും ഒറിജിനൽ മോഷൻ പിക്ചർ സൗണ്ട്ട്രാക്കുമെല്ലാം. ഇപ്പോൾ, ഹൊറർ ത്രില്ലർ ജോണറിൽപ്പെടുന്ന സിനിമയുടെ സെൻസറിംഗ് പൂർത്തിയായ വിവരം പങ്കുവെച്ചിരിക്കുകയാണ് അണിയറ പ്രവർത്തകർ.
യു/എ സർട്ടിഫിക്കറ്റാണ് ഭ്രമയുഗത്തിന് ലഭിച്ചിരിക്കുന്നത്. സിനിമ ഫെബ്രുവരി 15-ന് തിയേറ്ററുകളിലെത്തും. സെൻസറിംഗ് പൂർത്തിയായ വിവരം പങ്കുവെച്ചു കൊണ്ടുള്ള പോസ്റ്ററും പ്രേക്ഷകരെ അത്ഭുതപ്പെടുത്തുകയാണ്. നാക്കു നീട്ടി ഭയപ്പെടുത്തുന്ന രൂപത്തിൽ നിൽക്കുന്ന മമ്മൂട്ടിയെയാണ് പുതിയ പോസ്റ്ററിൽ കാണാൻ കഴിയുന്നത്. മഹാനടന്റെ രാക്ഷസരൂപം എന്ന് വിശേഷിപ്പിക്കാം. പുതിയ പോസ്റ്റർ കൂടി പുറത്തു വന്നതോടെ സിനിമാ പ്രേമികളുടെ കാത്തിരിപ്പിന് ആവേശം കൂടിയിരിക്കുകയാണ്.
രാഹുൽ സദാശിവൻ തന്നെയാണ് ഭ്രമയുഗത്തിന്റെ തിരക്കഥ രചിച്ചിരിക്കുന്നത്. സംഭാഷണങ്ങൾ എഴുതിയിരിക്കുന്നത് ടി.ഡി രാമകൃഷ്ണനാണ്. നൈറ്റ് ഷിഫ്റ്റ് സ്റ്റുഡിയോസിന്റെ ബാനറിൽ ചക്രവർത്തി രാമചന്ദ്രയും എസ് ശശികാന്തും ചേർന്ന് നിർമ്മിക്കുന്ന ഈ ചിത്രം നൈറ്റ് ഷിഫ്റ്റ് സ്റ്റുഡിയോയും വൈനോട്ട് സ്റ്റുഡിയോയും ചേർന്നാണ് അവതരിപ്പിക്കുന്നത്. ആൻ്റോ ജോസഫിന്റെ ‘ആൻ മെഗാ മീഡിയ’ കേരളത്തിലെ തിയേറ്ററുകളിൽ ചിത്രം വിതരണം ചെയ്യും. ഓവർസീസ് ഡിസ്ട്രിബ്യൂഷൻ സ്വന്തമാക്കിയിരിക്കുന്നത് ട്രൂത്ത് ഗ്ലോബൽ ഫിലിംസാണ്.
മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ 5 ഭാഷകളിലായി ഒരുങ്ങുന്ന മമ്മൂട്ടിയുടെ പാൻ ഇന്ത്യൻ ചിത്രമായിരിക്കും ഭ്രമയുഗം. ഛായാഗ്രഹണം-ഷെഹ്നാദ് ജലാൽ, ചിത്രസംയോജനം-ഷഫീഖ് മുഹമ്മദ് അലി, സംഗീതം-ക്രിസ്റ്റോ സേവ്യർ, സൗണ്ട് ഡിസൈൻ-ജയദേവൻ ചക്കടത്ത്, സൗണ്ട് മിക്സ്-എം.ആർ രാജകൃഷ്ണൻ, മേക്കപ്പ്-റോണക്സ് സേവ്യർ, വസ്ത്രാലങ്കാരം-മെൽവി ജെ എന്നിവരാണ് മറ്റ് അണിയറപ്രവർത്തകർ.
