ഒരിടവേളയ്ക്ക് ശേഷം നിവിൻ പോളി നായകനാകുന്ന തമിഴ് സിനിമയാണ് ‘ഏഴ് കടൽ ഏഴ് മലൈ’. മമ്മൂട്ടി നായകനായ പേരൻപിന് ശേഷം റാം അണിയിച്ചൊരുക്കുന്ന ചിത്രമാണിത്. സൂരിയും അഞ്ജലിയും ചിത്രത്തിൽ ശ്രദ്ധേയമായ വേഷത്തിൽ എത്തുന്നുണ്ട്. സിനിമയുടെ പ്രീമിയർ ഇന്ന് റോട്ടർഡാം ഇന്റർനാഷണൽ ഫിലിം ഫെസ്റ്റിവലിൽ വച്ച് നടക്കും.
ഇക്കാര്യം അണിയറപ്രവർത്തകർ നേരത്തെ ആരാധകരുമായി പങ്കുവച്ചിരുന്നു. ചലച്ചിത്രമേളയുടെ ‘ബിഗ് സ്ക്രീൻ കോമ്പറ്റീഷൻ’ എന്ന മത്സരവിഭാഗത്തിലേക്കാണ് ചിത്രം തിരഞ്ഞെടുത്തിരിക്കുന്നത്. പ്രണയത്തിന്റെ ഒരു വ്യത്യസ്തമായ ആവിഷ്കാരമാണ് ചിത്രത്തിൽ കാണിക്കുന്നത്. വളരെ വ്യത്യസ്തമായ ലുക്കിലാണ് ചിത്രത്തിൽ നിവിൻ പോളി എത്തുന്നത്.
2021 ൽ ആയിരുന്നു ചിത്രത്തിന്റെ പ്രഖ്യാപനവും ചിത്രീകരണവും ആരംഭിച്ചത്. എന്നാൽ ചില സാങ്കേതിക കാരണങ്ങളാൽ സിനിമ നീണ്ടുപോവുകയായിരുന്നു. വി ഹൗസ് പ്രൊഡക്ഷൻസിന്റെ ബാനറിൽ സുരേഷ് കാമാച്ചിയാണ് ചിത്രം നിർമ്മിക്കുന്നത്. സംഗീതം യുവൻ ശങ്കർ രാജ. ഛായാഗ്രഹണം ഏകാംബരവും നിർവ്വഹിക്കുന്നു.
