വാഷിംഗ്ടൺ: ജോർദാനിലെ അമേരിക്കയുടെ സൈനിക കേന്ദ്രങ്ങളിൽ നടത്തിയ ഇറാഖ്-സിറിയ എന്നിവിടങ്ങളിലെ ഇറാൻ കേന്ദ്രങ്ങളിൽ അമേരിക്ക നടത്തിയ പ്രത്യാക്രമണത്തിൽ പ്രതികരണവുമായി പ്രസിഡന്റ് ജോ ബൈഡൻ. തന്റെ നിർദ്ദേശപ്രകാരമാണ് ഇറാന്റെ കേന്ദ്രങ്ങളിൽ ആക്രമണം നടത്തിയതെന്നും, ഇവിടെ മുതൽ ഇറാനോടുള്ള അമേരിക്കയുടെ പ്രതികരണത്തിന് തുടക്കമാവുകയാണെന്നും ജോ ബൈഡൻ പറഞ്ഞു.
” ഇറാന്റെ ഇസ്ലാമിക് റെവല്യൂഷണറി ഗാർഡ്‌സ് കോർപ്‌സിന്റെ പിന്തുണയുള്ള തീവ്രവാദ സംഘടനകൾ നടത്തിയ ആക്രമണത്തിലാണ് മൂന്ന് അമേരിക്കൻ സൈനികർ കൊല്ലപ്പെട്ടത്. ഡോവർ എയർഫോഴ്‌സ് ബേസിൽ ഈ ധീരരായ സൈനികരുടെ അവസാന ചടങ്ങുകളിൽ ഞാൻ പങ്കെടുത്തു. ഇപ്പോൾ എന്റെ നിർദ്ദേശപ്രകാരമാണ് ഇറാന്റെ ഇസ്ലാമിക് റെവല്യൂഷണറി ഗാർഡ്‌സ് കോർപ്‌സിന്റേയും ഇവരുമായി ബന്ധമുള്ള തീവ്രവാദ ശക്തികളുടേയും കേന്ദ്രങ്ങളിൽ യുഎസ് സേന ആക്രമണം നടത്തിയത്. ഞങ്ങളുടെ പ്രതികരണത്തിനാണ് ഇവിടെ തുടക്കമാകുന്നത്. ഇനി മുതൽ ഞങ്ങൾ ചിന്തിക്കുന്ന ഇടങ്ങളിലെല്ലാം ഈ ആക്രമണം തുടരുമെന്നും” ജോ ബൈഡൻ പറഞ്ഞു.
അമേരിക്കയുടേയും ഞങ്ങളുടെ സേനയുടേയും താത്പര്യങ്ങൾ സംരക്ഷിക്കുന്നതിന് ആവശ്യമായ നടപടികൾ തുടരുമെന്ന് യുഎസ് പ്രതിരോധ സെക്രട്ടറി ലോയ്ഡ് ഓസ്റ്റിനും വ്യക്തമാക്കി. ” ഇത് തിരിച്ചടിയുടെ തുടക്കം മാത്രമാണ്. ഞങ്ങളുടെ സൈനികർക്കെതിരെ ആക്രമണം നടത്തിയ തീവ്രവാദ സംഘടനകൾക്കെതിരായ നടപടിക്ക് പ്രസിഡന്റിന്റെ നിർദ്ദേശം ലഭിച്ചു കഴിഞ്ഞു. മിഡിൽ ഈസ്റ്റിൽ ഒരു സംഘർഷത്തിന് തുടക്കമിടാൻ ഞങ്ങൾ ആഗ്രഹിക്കുന്നില്ല. എന്നാൽ അമേരിക്കൻ സേനയ്‌ക്കെതിരായ ആക്രമണങ്ങൾ വച്ചു പൊറുപ്പിക്കാനാകില്ലെന്നും” ലോയ്ഡ് ഓസ്റ്റിൻ വ്യക്തമാക്കി.
