ന്യൂഡൽഹി: കേരളത്തിലെ സാമ്പത്തിക പ്രതിസന്ധി സംസ്ഥാന സർക്കാരിന്റെ വീഴ്ചയെന്ന് കേന്ദ്രസർക്കാർ. സംസ്ഥാനത്തെ ധനവകുപ്പിലെ പിടിപ്പുകേടാണ് നിലവിലെ സാഹചര്യത്തിന് പിന്നിലെന്നും കേരളത്തിലേത് അതീവ മോശം ധനവകുപ്പാണെന്നും കേന്ദ്രം കുറ്റപ്പെടുത്തി. സംസ്ഥാനത്തിന്റെ ധനകാര്യസ്ഥിതി വിശദീകരിക്കുന്ന കുറിപ്പിലാണ് ഇക്കാര്യം പറയുന്നത്. ഇത് സുപ്രീംകോടതിയിൽ ഫയൽ ചെയ്തു.
അർഹതപ്പെട്ട എല്ലാ തുകയും നൽകിയെന്നും കുറിപ്പിൽ പറയുന്നു. കേന്ദ്ര നികുതികൾ, കേന്ദ്ര പദ്ധതികൾക്കുള്ള തുക തുടങ്ങിയവ നൽകിയതായും കേന്ദ്ര ധനമന്ത്രാലയം അറ്റോർണി ജനറലിന്റെ ഓഫീസ് മുഖേന നൽകിയ കുറിപ്പിൽ പറയുന്നു. 2018-19 ൽ സംസ്ഥാനത്തെ മൊത്തം വരുമാനത്തിന്റെ 31 ശതമാനം ആയിരുന്നു കടമെങ്കിൽ 2021-22 ആയപ്പോൾ 38 ശതമാനം ആയി ഉയർന്നതായി കേന്ദ്രസർക്കാർ സൂചിപ്പിക്കുന്നു.
സംസ്ഥാനം എടുക്കുന്ന കടത്തിന്റെ മൊത്തം പലിശ 10 ശതമാനത്തിൽ അധികമാകരുതന്നാണ് നിർദ്ദേശം. എന്നാൽ കഴിഞ്ഞ സാമ്പത്തിക വർഷം ഇത് 19.8 ശതമാനമായാണ് വർദ്ധിച്ചത്. ഏറ്റവും അധികം കടമുള്ള അഞ്ച് സംസ്ഥാനങ്ങളുടെ പട്ടികയിലാണ് കേരളവും. ഉയർന്ന പലിശ നൽകുന്നച് സംസ്ഥാനത്തിന്റെ ധനകാര്യസ്ഥിതിയെ പ്രതികൂലമായി ബാധിക്കുന്നുണ്ടെന്നും അതിനാൽ തന്നെ കടമെടുപ്പ് പരിധി ഉയർത്താനാകില്ലെന്നും കേന്ദ്ര ധനമന്ത്രാലയം സുപ്രീംകോടതിയെ അറിയിച്ചു.
