മലയാളികളുടെ സ്വന്തം മല്ലു അർജുൻ എന്നാണ് അല്ലു അർജുൻ അറിയപ്പെടുന്നത്. താരത്തിന്റെ സിനിമകളെല്ലാം കേരളത്തിലെ ആരാധകർ ഇരു കൈകളും നീട്ടിയാണ് സ്വീകരിക്കാറുള്ളത്. അല്ലു അർജുന്റെ പുഷ്പ ആദ്യഭാഗത്തിന് കേരളത്തിൽ നിന്നും വൻ കളക്ഷൻ നേടാൻ സാധിച്ചു. ഇനി ചിത്രത്തിന്റെ രണ്ടാം ഭാഗത്തിനായുള്ള കാത്തിരിപ്പിലാണ് ആരാധകർ. എന്നാൽ പുഷ്പ 2ന്റെ പ്രദർശനത്തിനു മുമ്പ് താരത്തിന്റെ മറ്റൊരു ചിത്രമാണ് കേരളത്തിൽ പ്രദർശനത്തിനെത്തുന്നത്. എന്നാൽ ഈ സിനിമ താരം അഭിനയിച്ച പഴയ ചിത്രത്തിന്റെ റീ റിലീസാണ്.
2018ൽ വാക്കന്തം വംശിയുടെ സംവിധാനത്തിൽ പുറത്തിറങ്ങിയ ‘എന്റെ പേര് സൂര്യ എന്റെ വീട് ഇന്ത്യ’ എന്ന ചിത്രമാണ് വീണ്ടും പ്രദർശനത്തിനെത്തുന്നത്. കേരളത്തിന് പുറമെ തമിഴ്നാട്ടിലും സിനിമ വീണ്ടും പ്രദർശനത്തിന് എത്തും. ഫെബ്രുവരി 23നാണ് സിനിമ തിയേറ്ററുകളിൽ എത്തുന്നത്.
അല്ലു അർജുന് ദേശീയ അവർഡ് നേടിക്കൊടുത്ത പുഷ്പ 1ന് കേരളത്തിൽ നിന്നും മികച്ച പ്രതികരണമാണ് ലഭിച്ചത്. ഓഗസ്റ്റ് 15ന് രണ്ടാം ഭാഗത്തിനായുള്ള കാത്തിരിപ്പിൽ ഇരിക്കുന്ന ആരാധകർക്ക് ഇപ്പോൾ ഇരട്ടി മധുരമാണ് ലഭിച്ചിരിക്കുന്നത്. ഫഹദ് ഫാസിലാണ് പുഷ്പ 2ലും പ്രതിനായക വേഷത്തിൽ എത്തുന്നത്.
