മലയാളികൾ ആവേശത്തോടെ കാത്തിരിക്കുന്ന മമ്മൂട്ടി ചിത്രമാണ് ഭ്രമയുഗം. വർഷങ്ങൾക്ക് ശേഷം മലയാളത്തിൽ പ്രദർശനത്തിനെത്തുന്ന ബ്ലാക്ക് ആൻഡ് വൈറ്റ് സിനിമ എന്നത് കൊണ്ടുതന്നെ ചിത്രം നൽകുന്ന ആവേശം വളരെ വലുതാണ്. ചിത്രത്തിന്റേതായി പുറത്തുവന്ന ഓരോ അപ്ഡേഷനും പ്രേക്ഷകർക്ക് ആവേശമായി മാറിയിരിക്കുകയാണ്. ഇപ്പോഴിതാ ചിത്രത്തിന്റെ ഏറ്റവും പുതിയ വിശേഷം പങ്കുവച്ചിരിക്കുകയാണ് അണിയറ പ്രവർത്തകർ.
ചിത്രത്തിന്റെ ഫൈനൽ മിക്സിംഗ് പൂർത്തിയായി എന്ന വാർത്തയാണ് ഇപ്പോൾ പുറത്തുവന്നിരിക്കുന്നത്. സന്തോഷം പങ്കുവച്ചുകൊണ്ടുള്ള ചിത്രവും അണിയറ പ്രവർത്തകർ പങ്കുവച്ചു. ഹൊറർ ത്രില്ലർ ജോണറിൽ ഒരുങ്ങുന്ന ചിത്രത്തിന്റെ ദൈർഘ്യം 2 മണിക്കൂർ 20 മിനിറ്റാണ്. ഫെബ്രുവരി 15 ന് ചിത്രം തീയേറ്ററുകളിലെത്തും. വളരെ വ്യത്യസ്തമായ വേഷത്തിലാണ് ചിത്രത്തിൽ മമ്മൂട്ടിയെത്തുന്നത്. ചിത്രത്തിന്റെതായി പുറത്തുവന്ന പോസ്റ്ററുകളും ടീസറും ആരാധകർ വളരെ അവേശത്തോടെയാണ് ഏറ്റെടുത്തത്.
ഭൂതകാലം എന്ന ഹിറ്റ് ചിത്രത്തിന് ശേഷം രാഹുൽ സദാശിവൻ സംവിധാനം ചെയ്യുന്ന ചിത്രമാണ് ഭ്രമയുഗം. മമ്മൂട്ടിക്കൊപ്പം യുവതാരങ്ങളും ചിത്രത്തിൽ അണിനിരക്കുന്നുണ്ട്. സിദ്ധാർത്ഥ് ഭരതൻ, അമാൽഡ ലിസ്, മണികണ്ഠൻ ആചാരി തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങൾ. ചിത്രത്തിൽ പ്രതിനായക വേഷത്തിലായിരിക്കും മമ്മൂട്ടി എത്തുന്നതെന്ന വാർത്തകൾ നേരത്തെ പുറത്തുവന്നിരുന്നു. കേരളത്തിന്റെ ഇരുണ്ട കാലഘട്ടത്തിൽ വേരൂന്നിയ കഥയാണ് ചിത്രം പറയുന്നത്. ചിത്രത്തിന്റെ ടീസറും ഇക്കാര്യം ഉറപ്പ് നൽകുന്നു.
‘ഭ്രമയുഗം’ മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിൽ പുറത്തിറങ്ങും. ചിത്രത്തിന്റെ തിരക്കഥ നിർവഹിക്കുന്നത് സംവിധായകൻ രാഹുൽ സദാശിവനാണ്. നൈറ്റ് സ്റ്റുഡിയോസിന്റെ ബാനറിൽ ചക്രവർത്തി രാമചന്ദ്രനും എസ്. ശശികാന്തുമാണ് നിർമ്മാണം. ഛായാഗ്രഹണം- ഷെഹനാദ് ജലാൽ, എഡിറ്റർ-ഷഫീക്ക് മുഹമ്മദ് അലി, സംഗീതം- ക്രിസ്റ്റോ സേവ്യർ, സംഭാഷണങ്ങൾ- ടി ഡി രാമകൃഷ്ണൻ.
