കാത്തിരിപ്പിന് വിരാമം; ദി കേരളാ സ്‌റ്റോറി ഈ മാസം ഒടിടിയിൽ എത്തും

ഇസ്ലാമിലേക്ക് മതപരിപർത്തനം ചെയ്യപ്പെട്ട യുവതികളുടെ ജീവിത കഥ തുറന്നുകാട്ടിയ ബോളിവുഡ് ചിത്രമായിരുന്നു ദി കേരളാ സ്‌റ്റോറി. തീയേറ്ററുകളിൽ ചിത്രം മികച്ച വിജയമാണ് നേടിയത്. 15-20 കോടി ബജറ്റിൽ നിർമ്മിച്ച കേരള സ്റ്റോറി ആഗോളതലത്തിൽ 300 കോടിയിലധികം കളക്ഷൻ നേടിയിരുന്നു. ഇപ്പോഴിതാ ഏറെ നാളത്തെ കാത്തിരിപ്പിനൊടുവിൽ സുദീപ്‌തോ സെൻ സംവിധാനം ചെയ്ത ദ കേരള സ്റ്റോറി ഒടിടിയിലെത്തുന്നു എന്ന വാർത്തയാണ് പുറത്തുവരുന്നത്. ചിത്രത്തിന്റെ അണിയറ പ്രവർത്തകർ തന്നെയാണ് ഈ വാർത്ത പങ്കുവച്ചത്.

 

View this post on Instagram

 

A post shared by Adah Sharma (@adah_ki_adah)

പ്രമുഖ ഒടിടി പ്ലാറ്റ്‌ഫോമായ ZEE5 ലൂടെയാണ് ചിത്രം സ്ട്രീമിംഗ് ആരംഭിക്കുന്നത്. ഫെബ്രുവരി 16 ന് ചിത്രം ഒടിടിയിൽ സ്ട്രീമിംഗ് ആരംഭിക്കും. ചിത്രം ഒടിടിയിലെത്തുന്നതിന്റെ സന്തോഷം പങ്കുവച്ച് നടി ആദാ ശർമയും രംഗത്തെത്തിയിരുന്നു. ‘ ഒടുവിൽ ആ സന്തോഷ വാർത്ത പങ്കുവക്കുകയാണ്, നിങ്ങളെല്ലാവരും ഏറെ പ്രതീക്ഷയോടെ കാത്തിരിക്കുന്ന ദി കേരള സ്‌റ്റോറി ഒടിടിയിലെത്തുന്നു. ഫെബ്രുവരി 16 മുതൽ ZEE 5 ലൂടെ ചിത്രം സ്ട്രീമിംഗ് ആരംഭിക്കും എന്നായിരുന്നു താരത്തിന്റെ കുറിപ്പ്.

അതേസമയം കേരള സ്റ്റോറി മേക്കേഴ്സ് പുതിയ ചിത്രത്തിന്റെ ചിത്രീകരണം പുരോഗമിക്കുകയാണ്. ബസ്തർ എന്ന് പേരിട്ടിരിക്കുന്ന ചിത്രത്തിന്റെ ടീസർ കഴിഞ്ഞ ദിവസമാണ് അണിയറ പ്രവർത്തകർ പുറത്തുവിട്ടത്. യഥാർത്ഥ സംഭവത്തെ’ അടിസ്ഥാനമാക്കിയാണ് സിനിമ. കേരളാ സ്റ്റോറിയ്‌ക്ക് ശേഷം വിപുൽ അമൃത്‌ലാൽ ഷായും സുദീപ്തോ സെന്നും ഒന്നിക്കുന്ന ചിത്രമാണ് ബസ്തർ. ചിത്രം ഈ വർഷം തീയേറ്ററുകളിലെത്തും.