രാമൻ എന്നത് ഓരോ ഭാരതീയരുടെയും വികാരമാണെന്ന് സംവിധായകൻ കെ.ജി ജോർജിന്റെ മകൾ താര കെ ജോർജ്. അയോദ്ധ്യയിൽ രാമക്ഷേത്രം നിർമ്മിച്ചതിൽ എല്ലാവരും അഭിമാനിക്കുകയാണ് വേണ്ടതെന്നും രാമൻ എന്നത് നമ്മുടെ ഊർജ്ജവും ശക്തിയുമാണെന്നും താര പറഞ്ഞു. ഭഗവാൻ രാമന്റെ ഭവനത്തിൽ ഉറപ്പായും പോകുമെന്ന് ഒരു ഓൺലൈൻ മാദ്ധ്യമത്തിന് നൽകിയ അഭിമുഖത്തിൽ താര കെ ജോർജ് വ്യക്തമാക്കി.
“അയോദ്ധ്യ രാമക്ഷേത്രത്തിന്റെ പുനർനിർമ്മാണത്തിന്റെ ഓരോ ഘട്ടവും വർഷങ്ങളായി പിന്തുടരുന്ന വ്യക്തിയാണ് ഞാൻ. അതിന്റെ ഒരോ ചെറിയ കാര്യങ്ങൾ പോലും എനിക്ക് താത്പര്യമുള്ള വിഷയങ്ങളായിരുന്നു. രാമക്ഷേത്രത്തിലെ പ്രാണപ്രതിഷ്ഠ വീട്ടിലിരുന്നാണ് ഞാൻ കണ്ടത്. ക്ഷേത്രത്തിൽ ചടങ്ങുകൾ നടക്കുന്നത് കണ്ടപ്പോൾ രോമാഞ്ചം ഉണ്ടായി. ഞാൻ ശരിക്കും കരഞ്ഞു, എന്റെ കണ്ണുകൾ നിറഞ്ഞു. ആ ഒരു നിമിഷം, രാംലല്ലയെ പ്രതിഷ്ഠിച്ച ആ നിമിഷം ഞാൻ ജീവിതത്തിൽ ഒരിക്കലും മറക്കത്തില്ല”.
“രാമൻ എന്നത് നമ്മുടെ ഒരു വികാരമാണ്. അത് പറഞ്ഞ് മനസിലാക്കാൻ സാധിക്കില്ല. രാമൻ എന്നത് ഒരു ശക്തിയാണ്, ഊർജ്ജമാണ്. രാമനെ മതത്തിന്റെയോ പാർട്ടിയുടെയോ ആക്കി ചിത്രീകരിക്കേണ്ട ആവശ്യമില്ല. രാമക്ഷേത്രത്തിലെ പ്രാണപ്രതിഷ്ഠ ഒരു ചരിത്ര മുഹൂർത്തമായിരുന്നു. ഫ്രഞ്ച് പ്രസിഡന്റ് അടക്കമുള്ള ലോകനേതാക്കൾ ലൈവായി കണ്ട ഒരു ആഘോഷം. രാമക്ഷേത്രത്തിൽ അഭിമാനിക്കണം. രാമക്ഷേത്രം എന്റെ സ്വപ്നമാണ്. എനിക്ക് അവിടെ പോകണം. ഭഗവാന്റെ ഭവനമാണ് അത്”- താര കെ ജോർജ് പറഞ്ഞു.
