റിലീസ് ചെയ്ത് ദിവസങ്ങൾക്കുള്ളിൽ സമൂഹമാദ്ധ്യമങ്ങളിൽ ശ്രദ്ധേയമായി ഉണ്ണിമുകുന്ദൻ ചിത്രം ജയ് ഗണേഷിന്റെ ടീസർ. ചുരുങ്ങിയ ദിവസങ്ങൾക്കുള്ളിൽ 20 ലക്ഷത്തോളം പേരാണ് ട്രെയിലർ കണ്ടിരിക്കുന്നത്. ദിവ്യാംഗനായ ചെറുപ്പക്കാരന്റെ സ്വപ്നങ്ങളും, ആ യുവാവിന്റെ ജീവിതത്തിൽ അപ്രതീക്ഷിതമായി വന്നെത്തുന്ന സൂപ്പർ പവറുമാണ് സിനിമയുടെ സാരാംശം.
ഉണ്ണിമുകുന്ദനെ നായകനാക്കി രഞ്ജിത്ത് ശങ്കർ തിരക്കഥയെഴുതിയാണ് ചിത്രം സംവിധാനം ചെയ്തിരിക്കുന്നത്. താരത്തിന്റെ കരിയറിലെ മറ്റൊരു സൂപ്പർ ഹിറ്റ് ചിത്രമാകും ജയ് ഗണേഷെന്നും ഉറപ്പിച്ച് പറയാവുന്നതാണ് ടീസർ.
ഏപ്രിൽ പതിനൊന്നിനാണ് ജയ് ഗണേഷ് തിയേറ്ററിലെത്തുന്നത്. മഹിമ നമ്പ്യാർ നായികയാവുന്ന ചിത്രത്തിൽ ഒരിടവേളയ്ക്ക് ശേഷം ജോമോളും അഭിനയിക്കുന്നുണ്ട്. ഉണ്ണി മുകുന്ദൻ ഫിലിംസും രഞ്ജിത്ത് ശങ്കറിന്റെ ഡ്രീംസ് എൻ ബിയോണ്ടും ചേർന്നാണ് ചിത്രം നിർമ്മിക്കുന്നത്. ഹരീഷ് പേരടി, അശോകൻ, രവീന്ദ്ര വിജയ്, നന്ദു തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്.