ഗാന്ധിനഗർ: ഗുജറാത്തിലെ വിവിധ സർക്കാർ വകുപ്പുകളിലേക്ക് നിയമനം ലഭിച്ച ഉദ്യോഗാർത്ഥികളെ അഭിനന്ദിച്ച് പ്രധാനമന്ത്രി നരേന്ദ്രമോദി. ഗാന്ധിനഗറിൽ സംഘടിപ്പിച്ച പൊതുപരിപാടിയിൽ ഗുജറാത്ത് മുഖ്യമന്ത്രി ഭൂപേന്ദ്ര പട്ടേലാണ് ഉദ്യോഗാർത്ഥികൾക്ക് നിയമന കത്തുകൾ കൈമാറിയത്. തിരഞ്ഞെടുക്കപ്പെട്ട 1,990 ഉദ്യോഗാർത്ഥികളെയാണ് സംസ്ഥാന സർക്കാരിന്റെ വിവിധ തസ്തികകളിലേക്ക് നിയമിച്ചത്.
സർക്കാർ സർവീസിൽ ചേരാനും രാജ്യത്തെ സേവിക്കാനുമുള്ള മികച്ച അവസരമാണിതെന്ന് പ്രധാനമന്ത്രി പറഞ്ഞു. ‘വരാനിരിക്കുന്ന 25 വർഷം നമ്മുടെ രാജ്യത്തിന് വളരെ പ്രധാനപ്പെട്ടതാണ്. പൊതുജനങ്ങളുടെ ക്ഷേമത്തിനാണ് സർക്കാർ മുൻഗണന നൽകുന്നത്. നിങ്ങളുടെ നിശ്ചയദാർഢ്യവും രാജ്യതാൽപ്പര്യത്തിന് വേണ്ടി സ്വീകരിക്കുന്ന തീരുമാനങ്ങളും രാജ്യത്തിന്റെ വികസനത്തെ ശക്തിപ്പെടുത്തും. ഈ ഉത്തരവാദിത്തം നിങ്ങൾക്ക് പുതിയ അവസരങ്ങളും വെല്ലുവിളികളും കൊണ്ടുവരും’.
‘ഏത് വകുപ്പിലേക്ക് നിങ്ങളെ നിയമിച്ചാലും, എവിടെയായാലും ഏത് സാഹചര്യത്തിലായാലും പൊതുജനങ്ങളെ സഹായിക്കുക എന്നതായിരിക്കണം നിങ്ങളുടെ പ്രധാന ചുമതല. അവരുടെ പ്രശ്നങ്ങൾ പരിഹരിക്കാനായി നിങ്ങൾ പ്രവർത്തിക്കണം. വികസിത രാജ്യം കെട്ടിപ്പടുക്കുക എന്ന എല്ലാവരുടെയും സ്വപ്നം സാക്ഷാത്കരിക്കണം’ – പ്രധാനമന്ത്രി പറഞ്ഞു.