കോഴിക്കോട്: കൂരാച്ചുണ്ടിൽ ജനവാസമേഖലയിൽ കാട്ടുപോത്തിറങ്ങി പരിഭ്രാന്തി സൃഷ്ടിച്ചു. സമീപത്തുള്ള പെരുവണ്ണാമുഴി വനത്തിൽ നിന്നാണ് കാട്ടുപോത്തിറങ്ങിയതെന്നാണ് നിഗമനം. ഇന്നലെ വൈകിട്ട് ചാലിടമെന്ന സ്ഥലത്തിൽ ഇറങ്ങിയ കാട്ടുപോത്ത് ഇന്ന് രാവിലെ നഗരത്തിലെ റോഡിൽ നിലയുറപ്പിക്കുകയായിരുന്നു. തുടർന്ന് നാട്ടുകാർ പ്രദേശത്ത് ഇറങ്ങിയതോടെ ഇത് സമീപത്തെ ഒരു വീട്ടുവളപ്പിലേക്ക് നീങ്ങി. ഇതോടെ നാട്ടുകാർ വനംവകുപ്പിനെ വിവരം അറിയിക്കുകയായിരുന്നു.
ആൾ താമസമില്ലാത്ത വീടാണിതെന്ന് നാട്ടുകാർ പറഞ്ഞു. കാട്ടുപോത്ത് മറ്റു ഭാഗങ്ങളിലേക്ക് നീങ്ങി പരിഭ്രാന്തി സൃഷ്ടിക്കാതിരിക്കാനായി വനം വകുപ്പ് വീട്ട് വളപ്പിന്റെ ഗേറ്റ് അടച്ചിട്ടുണ്ട്. പോത്തിനെ കാട്ടിലേക്ക് തന്നെ തുരത്താനുള്ള വഴി തേടുന്നുണ്ടെന്നും വൈകാതെ പ്രശ്നത്തിന് പരിഹാരം കണ്ടെത്തുമെന്നും വനംവകുപ്പ് അറിയിച്ചു. പ്രദേശത്ത് കാട്ടുപന്നി ശല്യവും ഇതുപോലുള്ള വന്യമൃഗ ശല്യവും വർദ്ധിച്ചു വരികയാണെന്ന് നാട്ടുകാർ പറഞ്ഞു.