വിവിധയിടങ്ങളിൽ ഇരുന്ന് വിവിധ രുചികൾ പരീക്ഷിക്കാൻ ഇഷ്ടപ്പെടുന്നവരായിരിക്കും നമ്മിൽ ബഹുഭൂരിപക്ഷവും. ഹോട്ടലിലും വീട്ടിലുമൊക്കെ ഭക്ഷണം കഴിച്ച് മടുമ്പോൾ ഒരു പിക്നിക്കിനൊക്കെ പോയി ഭക്ഷണം കഴിക്കാനും നാം താത്പര്യപ്പെടാറുണ്ട്. എന്നാൽ എപ്പോഴെങ്കിലും ബഹിരാകാശത്തിരുന്ന് അവിടുത്തെ കാഴ്ചകൾ കണ്ട് ഭക്ഷണം കഴിക്കണമെന്ന് നിങ്ങൾക്ക് ആഗ്രഹം തോന്നിയിട്ടുണ്ടോ? എങ്കിൽ ആ ആഗ്രഹവും നിറവേറ്റാൻ ഒരുങ്ങുകയാണ് ആഡംബര ബഹിരാകാശ കമ്പനിയായ സ്പേസ് വിഐപി.
ബഹിരാകാശത്ത് ഇരുന്നുകൊണ്ട് ആഹാരം കഴിക്കാൻ ലഭിക്കുന്ന സുവർണാവസരമാണ് ഇതിലൂടെ ലഭിക്കുന്നത്. 2025ഓടെ ഇത് സാധ്യമാകുമെന്നും സ്പേസ് വിഐപി പറയുന്നു. അന്തരീക്ഷത്തിൽ നിന്നും ഏകദേശം 30 കിലോമീറ്റർ ഉയരത്തിൽ പറന്നുപൊങ്ങി ഭക്ഷണം കഴിക്കാനുള്ള അവസരമായിരിക്കും നിങ്ങൾക്ക് ലഭിക്കുക. സ്പേസ് പെഴ്സ്പെക്റ്റീവിന്റെ നെപ്ട്യൂൺ ക്യാപ്സ്യൂൾ 2024ഓടെ പറന്നുയരും. ഇത് യാഥാർത്ഥ്യമാകുന്നതോടെ നെപ്ട്യൂൺ ക്യാപ്സ്യൂളിൽ ഇരുന്ന് ബഹിരാകാശ കാഴ്ചകൾ കണ്ടുകൊണ്ട് ഭക്ഷണം ആസ്വദിക്കാം.
ലോകത്തെ മികച്ച റസ്റ്റോറന്റുകളിൽ മുൻനിരയിൽ നിൽക്കുന്ന ഡാനിഷ് റെസ്റ്റോറന്റ് ആൽക്കമെസ്റ്റിലെ ഷെഫാണ് വിരുന്നിനായുള്ള ഭക്ഷണം ഒരുക്കുന്നത്. വായിൽ കപ്പലോടുന്ന വിഭവങ്ങൾ ആസ്വദിച്ച് 6 പേർക്ക് ഈ ക്യാപ്സ്യൂളിൽ യാത്ര ചെയ്യാൻ സാധിക്കുമെന്നും സ്പേസ് വിഐപി പറയുന്നു.
യാത്രക്കാർക്കായി ഭക്ഷണം മാത്രമല്ല ക്യാപ്സ്യൂളിൽ ഒരുക്കുന്നത്. പ്രത്യേക വിശ്രമമുറികളും, വൈഫൈ സൗകര്യങ്ങളും ഫാഷൻ ഹൗസും ഇതിൽ ഒരുക്കും. സംഗതിയൊക്കെ രസകരമാണെങ്കിലും ഇത്തരത്തിലൊരു യാത്ര പോകാൻ നിങ്ങൾ ആഗ്രഹിക്കുന്നുണ്ടെങ്കിൽ 4 കോടി രൂപയാണ് ഇതിനായി ചെലവഴിക്കേണ്ടത്.
