കൊച്ചി: നടൻ മോഹൻലാൽ ഫെഫ്കയിൽ അംഗത്വം നേടി. കൊച്ചിയിൽ സംഘടിപ്പിച്ച ചലച്ചിത്ര തൊഴിലാളി സംഗമത്തിൽ വച്ചാണ് അദ്ദേഹം യൂണിയനിൽ അംഗത്വമെടുത്തത്. ബറോസ് എന്ന സിനിമയുടെ സംവിധായകനായ അദ്ദേഹം ഫെഫ്കയുടെ ഡയറക്ടേഴ്‌സ് യൂണിയനിലാണ് അംഗത്വം സ്വീകരിച്ചത്.
തൊഴിലാളി സംഗമത്തോടനുബന്ധിച്ച് ഇന്ന് മലയാള സിനിമ, സീരിയൽ, വെബ് സീരീസ് എന്നിവയുടെ ചിത്രീകരണത്തിനും മറ്റ് അനുബന്ധ പ്രവർത്തനങ്ങൾക്കും അവധി പ്രഖ്യാപിച്ചിരുന്നു. ഫെഫ്ക അംഗങ്ങൾക്കായി ഏർപ്പെടുത്തിയിരിക്കുന്ന ആരോഗ്യ സുരക്ഷാ പദ്ധതിയുടെ ഉദ്ഘാടനവും ഇന്ന് നടന്നു. വർഷത്തിൽ മൂന്ന് ലക്ഷം രൂപ വരെ ചികിത്സാ സഹായം ലഭിക്കുന്ന പദ്ധതി ഏപ്രിൽ ഒന്നിന് നിലവിൽ വരും.
സംവിധായകൻ സിബി മലയിലാണ് മോഹൻലാലിന് ഫെഫ്ക സംവിധായക യൂണിയന്റെ അംഗത്വം കൈമാറിയത്. സ്വീകരണത്തിന് ഹൃദയം നിറഞ്ഞ നന്ദിയുണ്ടെന്നും ഫെഫ്ക സംവിധായക കുടുംബത്തിന്റെ ഭാഗമാകുന്നതിൽ അഭിമാനമുണ്ടെന്നും മോഹൻലാൽ സമൂഹമാദ്ധ്യമങ്ങളിൽ കുറിച്ചു.
