കോട്ടയം: മുഖ്യമന്ത്രി പിണറായി വിജയനെതിരെ വിമർശനവുമായി ബിജെപി ദേശീയ നിർവാഹക സമിതിയംഗം പികെ കൃഷ്ണദാസ്. മുഖ്യമന്ത്രി നടത്തുന്നത് കടുത്ത വർഗീയ പ്രചരണമാണെന്നും ഇസ്ലാം മതവികാരം ആളിക്കത്തിക്കാനാണ് ശ്രമിക്കുന്നതെന്നും കൃഷ്ണദാസ് പറഞ്ഞു. കോട്ടയത്ത് മാദ്ധ്യമപ്രവർത്തകരോട് സംസാരിക്കവെയാണ് അദ്ദേഹം ഇക്കാര്യം ചൂണ്ടിക്കാട്ടിയത്.
“ഭരണ പരാജയം മറച്ചു വെക്കാനാണ് മുഖ്യമന്ത്രി ശ്രമിക്കുന്നത്. രാഷ്ട്രീയ ലാഭത്തിന് വേണ്ടി നടത്തുന്ന ഈ പ്രചരണം രാജ്യ ദ്രോഹപരമാണ്. മുസ്ലിം സമൂഹത്തിനിടയിൽ അരക്ഷിതാവസ്ഥ ഉണ്ടാക്കുകയാണ് മുഖ്യമന്ത്രിയുടെ ഉദ്ദേശ്യം. ഇത്തരം അവസ്ഥയിലാണ് സമൂഹത്തിലെ യുവാക്കൾ തീവ്രവാദത്തിലേക്ക് നീങ്ങുന്നത്. മുഖ്യമന്ത്രി തീവ്രവാദ പ്രവർത്തനത്തിനുള്ള റിക്രൂട്ട്മെന്റ് ഏജന്റായി മാറിയിരിക്കുകയാണ്”.
മുഖ്യമന്ത്രി സിഎഎ വിരുദ്ധ പ്രസംഗങ്ങളിലൂടെ മുസ്ലീങ്ങളുടെ വികാരങ്ങൾ ആളികത്തിക്കുന്നു. മലപ്പുറത്തായിരുന്നു ഇത്തരം സമ്മേളനങ്ങളുടെ തുടക്കം. മുസ്ലീം സമൂഹം കൂടുതലുള്ള സ്ഥലങ്ങളിലാണ് മുഖ്യമന്ത്രി മതവികാരം വ്രണപ്പെടുത്തുന്ന തരത്തിൽ പ്രസംഗം നടത്തുന്നത്. ഇന്ത്യയിലെ മുസ്ലീംങ്ങൾ രണ്ടാം തരം പൗരന്മാരായി മാറിയിരിക്കുന്നു, മുസ്ലീംങ്ങളുടെ പൗരത്വം റദ്ദ് ചെയ്ത് അവരെ പാകിസ്താനിലേക്ക് അയക്കാനാണ് മോദി സർക്കാർ തയാറാകുന്നത് ഇത്തരം വ്യാജ പ്രചാരണങ്ങളാണ് മുഖ്യമന്ത്രി സിഎഎ വിരുദ്ധ സമ്മേളത്തിൽ നടത്തികൊണ്ടിരിക്കുന്നതെന്നും പികെ കൃഷ്ണദാസ് പറഞ്ഞു.
