2024 മലയാള സിനിമയുടെ വിജയവർഷമായാണ് പ്രേക്ഷകർ ഒന്നടങ്കം പറയുന്നത്. വർഷമാദ്യം ഇറങ്ങിയ എല്ലാ ചിത്രങ്ങളും വമ്പൻ ബോക്സോഫീസ് കളക്ഷനാണ് സ്വന്തമാക്കിയത്. ഫെബ്രുവരിയിലിറങ്ങിയ പ്രേമലു, ഭ്രമയുഗം, മഞ്ഞുമ്മൽ ബോയ്സ്, അന്വേഷിപ്പിൻ കണ്ടെത്തും തുടങ്ങിയ ചിത്രങ്ങൾ ഹിറ്റ് പട്ടികയിൽ ഒന്നാമതെത്തി. വിഷു പ്രമാണിച്ച് മൂന്ന് ചിത്രങ്ങളാണ് ഇന്ന് തിയേറ്ററുകളിലെത്തുന്നത്.
ജയ്ഗണേഷ്, വർഷങ്ങൾക്ക് ശേഷം, ആവേശം എന്നീ സിനിമകളാണ് പ്രേക്ഷകരുടെ ഹൃദയങ്ങൾ കീഴടക്കാനെത്തുന്നത്. കുടുംബ പ്രേക്ഷകർ കാത്തിരിക്കുന്ന ഉണ്ണിമുകുന്ദൻ ചിത്രമാണ് ജയ്ഗണേഷ്. ഉണ്ണി മുകുന്ദനെ നായകനാക്കി രഞ്ജിത്ത് ശങ്കർ തിരക്കഥ എഴുതി സംവിധാനം ചെയ്യുന്ന ചിത്രമാണിത്. ഉണ്ണി മുകുന്ദന്റെ കരിയറിലെ ഏറ്റവും മികച്ച ചിത്രമെന്നാണ് താരമുൾപ്പെടെയുള്ള അണിയറപ്രവർത്തകർ പറയുന്നത്. ഉണ്ണി മുകുന്ദൻ ഫിലിംസും രഞ്ജിത്ത് ശങ്കറിന്റെ ഡ്രീംസ് എൻ ബിയോണ്ടും ചേർന്നാണ് ചിത്രം നിർമിക്കുന്നത്.
വിനീത് ശ്രീനിവാസന്റെ സംവിധാനത്തിലൊരുങ്ങിയ വർഷങ്ങൾക്ക് ശേഷമാണ് വിഷുക്കാലത്തെത്തുന്ന മറ്റൊരു ചിത്രം. യുവതാരനിര അണിനിരക്കുന്ന ചിത്രത്തിനായി വെയിറ്റിംഗായിരുന്നു മലയാളികൾ. വിനീത് ശ്രീനിവാസൻ തന്നെ തിരക്കഥ ഒരുക്കിയ ചിത്രത്തിൽ പ്രണവിനും ധ്യാനിനുമൊപ്പം നിവിൻ പോളിയും ഒരു പ്രധാന കഥാപാത്രം ചെയ്യുന്നുണ്ട്. അജു വർഗീസ്, കല്യാണി പ്രിയദർശൻ, ബേസിൽ ജോസഫ്, വിനീത് ശ്രീനിവാസൻ, നീരജ് മാധവ് എന്നിങ്ങനെ ഒരു വൻ താരനിരയാണ് ചിത്രത്തിൽ അണിനിരക്കുന്നത്.
ആവേശം ഒട്ടും കുറക്കാതെ പ്രേക്ഷകരുടെ മുന്നിലെത്തുന്ന ചിത്രമാണ് ആവേശം. ഫഹദ് ഫാസിൽ നായകനായെത്തുന്ന ചിത്രത്തിന്റെ വെൽക്കം ടീസർ കഴിഞ്ഞ ദിവസമാണ് റിലീസ് ചെയ്തത്. അഡ്വാൻസ് ബുക്കിംഗിലും ചിത്രത്തിന് വലിയ സ്വീകാര്യത ലഭിച്ചിരിക്കുകയാണ്. ചിത്രത്തിന് അഡ്വാൻസ് ടിക്കറ്റ് ബുക്കിംഗിലൂടെ ആഗോളതലത്തിൽ ഒരു കോടിയിലേറെ രൂപ ലഭിച്ചു. ജിത്തു മാധവൻ സംവിധാനം ചെയ്യുന്ന ചിത്രത്തിൽ ആശിഷ് വിദ്യാര്ത്ഥി, സജിന് ഗോപു, റോഷന്, മിഥുന് ജെഎസ്, പൂജ മോഹന്രാജ്, നീരജ രാജേന്ദ്രന് തുടങ്ങിയവർ പ്രധാന വേഷത്തിലെത്തുന്നു.
