ബെംഗളൂരു: ഐപിഎൽ പ്രകടനം തുണയായി, മലയാളി താരങ്ങളായ സജന സജീവനും ആശ ശോഭനയും ഇന്ത്യൻ ടീമിൽ. ബംഗ്ലാദേശിനെതിരെയുള്ള ടി20 പരമ്പരയ്ക്കുള്ള ടീമിലാണ് ഇരുവരും ഇടം പിടിച്ചത്. മിന്നു മണിക്ക് ശേഷം സീനിയർ ടീമിൽ ഇടംപിടിക്കുന്ന താരങ്ങളാണ് ഇരുവരും. വയനാട് സ്വദേശിയായ സജന വുമൺ പ്രിമിയർ ലീഗിൽ മുംബൈ ഇന്ത്യൻസിന്റെ താരമായിരുന്നു. തിരുവനന്തപുരം പേരൂർക്കട സ്വദേശിയായ ആശ ശോഭന പുതുച്ചേരിക്ക് വേണ്ടിയാണ് ആഭ്യന്തര ക്രിക്കറ്റ് കളിക്കുന്നത്.
റോയൽ ചലഞ്ചേഴ്സ് ബെംഗളൂരു താരമായ ആശ അവരുടെ കിരീട നേട്ടത്തിൽ വലിയ പങ്കാണ് വഹിച്ചത്. ഡൽഹി ക്യാപിറ്റൽസിനെതിരായ മത്സരത്തിലെ അവസാന പന്തിൽ കൂറ്റൻ സിക്സർ പറത്തി മുംബൈ വിജയത്തിലേക്ക് നയിക്കാൻ സജനയ്ക്ക് കഴിഞ്ഞിരുന്നു. മിന്നൽ ഫീൾഡറും വമ്പനടിക്കാരിയുമായ സജന സ്പിൻ ഓൾ റൗണ്ടറാണ്. കീറോൺ പൊള്ളാർഡ് എന്നാണ് മുംബൈ ഇന്ത്യൻസിൽ അറിയപ്പെട്ടിരുന്നത്.
അതേസമയം മറ്റൊരു വയനാട്ടുകാരിയായ മിന്നു മണിക്ക് ടീമില് ഇടം നേടാനായില്ല. അഞ്ചു മത്സരങ്ങളുള്ള ടി20 പരമ്പരയാണ് ഇന്ത്യ കളിക്കുന്നത്. ഇന്ത്യന് ടീം: ഹര്മന്പ്രീത് കൗര് (ക്യാപ്റ്റൻ) സ്മൃതി മന്ദാന (വൈസ് ക്യാപ്റ്റന്), ഷെഫാലി വര്മ, ദയാലന് ഹേമലത, സജന സജീവന്, റിച്ച ഘോഷ് (വിക്കറ്റ് കീപ്പര്), യാസ്തിക ഭാട്ടിയ (വിക്കറ്റ് കീപ്പര്), രാധാ യാദവ്, ദീപ്തി ശര്മ, പൂജ വസ്ത്രകര്, അമന്ജോത് കൗര്, ശ്രേയങ്ക പാട്ടീല്, സൈക ഇഷാഖ്, ആശാ ശോഭന, രേണുക സിംഗ് , ടൈറ്റസ് സധു.
