ഹൈദരാബാദ്: 15 അസംബ്ലി നിയോജക മണ്ഡലങ്ങൾ ഉൾപ്പെടുന്ന ഹൈദരാബാദ് ജില്ലയിലെ വോട്ടർ പട്ടികയിൽ നിന്ന് 5.41 ലക്ഷം വോട്ടർമാരെ നീക്കം ചെയ്ത് തെരഞ്ഞെടുപ്പ് കമ്മീഷൻ. മരിച്ച ആളുകൾ, സ്ഥലം മാറി പോയവർ, വ്യാജ വോട്ടർമാർ എന്നിവരെ ഉൾപ്പെടെ ഒഴിവാക്കി തെരഞ്ഞെടുപ്പ് പ്രക്രിയ സുഗമമാക്കുന്നതിന്റെ ഭാഗമായിട്ടാണ് നീക്കമെന്ന് തെരഞ്ഞെടുപ്പ് കമ്മീഷൻ അറിയിച്ചു.
വോട്ടർ പട്ടികയുടെ കരുത്ത് ഉറപ്പ് വരുന്നതിനും സ്വതന്ത്രവും നീതിയുക്തവുമായ തെരഞ്ഞെടുപ്പ് ഉറപ്പാക്കുന്നതിനും വേണ്ടിയുള്ള ശ്രമങ്ങൾ തുടരുകയാണെന്ന് കമ്മീഷൻ അറിയിച്ചു. വോട്ടർ പട്ടികയിൽ നിന്ന് ഒഴിവാക്കിയ 47,141 പേർ മരിച്ചവരാണ്. സ്ഥലം മാറി പോയവർ 4,39,801വും, 54,259 ഡ്യൂപ്ലിക്കേറ്റ് വോട്ടർമാർ എന്നിവരേയും പട്ടികയിൽ നിന്ന് ഒഴിവാക്കിയിട്ടുണ്ട്.
5,01,604 വോട്ടർമാരെ പട്ടികയിൽ പുതിയതായി ചേർത്തിട്ടുണ്ടെന്നും അധികൃതർ വ്യക്തമാക്കി. വീട്ടുനമ്പറുകളിൽ ഉൾപ്പെടെ ചിലയിടങ്ങളിൽ പൊരുത്തക്കേടുകൾ കണ്ടെത്തിയതോടെ ഇത് പരിഹരിക്കാനുള്ള ശ്രമങ്ങളും ആരംഭിച്ചിട്ടുണ്ട്. എഐഎംഐഎം നേതാവ് അസദുദ്ദീൻ ഒവൈസിയുടെ മണ്ഡലം കൂടിയാണിത്. 5,17,471 വോട്ടുകൾ നേടിയാണ് 2019ൽ ഒവൈസി സീറ്റ് നിലനിർത്തിയത്.
