വാരണാസി : അയോദ്ധ്യയിലെ രാം ലല്ലയുടെ വിഗ്രഹത്തിന്റെ മാതൃകയിൽ പുതിയ വിഗ്രഹം ഒരുക്കി കാശിയിലെ ശിൽപി കനയ്യ ലാൽ ശർമ്മ. നെതർലൻഡ്‌സിലെ ഹനുമാൻ ക്ഷേത്രത്തിൽ പ്രതിഷ്ഠിക്കാനായാണ് ഈ വിഗ്രഹം നിർമ്മിച്ചത് . നെതർലൻഡ്‌സിലേക്കുള്ള യാത്രയ്‌ക്ക് മുമ്പ് വിഗ്രഹം പൂജകൾക്കായി അയോദ്ധ്യയിൽ എത്തിക്കും. സനാതന ധർമ്മത്തെ പ്രോത്സാഹിപ്പിക്കുന്നതിനായി രൂപീകരിച്ചിരിക്കുന്ന എറ്റർബ്ലിസ് ഫൗണ്ടേഷൻ എന്ന സംഘടനയാണ് വിഗ്രഹ നിർമ്മാണത്തിന് പിന്നിൽ.
മറ്റ് യൂറോപ്യൻ രാജ്യങ്ങളിലും രാംലല്ലയുടെ വിഗ്രഹങ്ങൾ സ്ഥാപിക്കാനാണ് ഫൗണ്ടേഷന്റെ പദ്ധതി. എറ്റർബ്ലിസ് ഫൗണ്ടേഷന്റെ സ്ഥാപകനായ സ്വാമി അഖണ്ഡ് സാമ്രാട്ട് ആനന്ദ്ജി ലോകമെമ്പാടും രാമക്ഷേത്രങ്ങൾ സ്ഥാപിക്കാൻ മുൻകൈ എടുത്തിട്ടുണ്ട്.
‘ ഞങ്ങൾ ആംസ്റ്റർഡാമിലെ ഹനുമാൻ ക്ഷേത്രത്തിൽ രാം ലല്ലയുടെ വിഗ്രഹം സ്ഥാപിക്കാൻ തീരുമാനിച്ചു. കൃത്യമായ പകർപ്പ് ഉറപ്പാക്കാൻ, ഞങ്ങൾ അയോദ്ധ്യയിൽ പ്രതിഷ്ഠിച്ച വിഗ്രഹത്തിന് ഉപയോഗിച്ച അതേ മെറ്റീരിയൽ തന്നെ തിരഞ്ഞെടുത്തു.” – ഫൗണ്ടേഷൻ ഡയറക്ടർ രാഹുൽ മുഖർജി പറഞ്ഞു
ഡയാന രാജകുമാരിയുടെ പിങ്ക് കൽ പ്രതിമ ഒരുക്കിയ കലാകാരനാണ് കനയ്യ . ഫെബ്രുവരി 24-ന് ബസന്ത് പഞ്ചമി ദിനത്തിലാണ് രാം ലല്ലയുടെ വിഗ്രഹം നിർമ്മിക്കാൻ ആരംഭിച്ചത് . അയോദ്ധ്യയിൽ പ്രതിഷ്ഠിച്ചതിൽ നിന്ന് ചെറിയ വ്യത്യാസങ്ങൾ മാത്രമേ ഈ വിഗ്രഹത്തിലുള്ളൂവെന്ന് കനയ്യ പറയുന്നു.
ഇതേ രീതിയിൽ കൂടുതൽ വിഗ്രഹങ്ങൾ ഒരുക്കാനും കനയ്യയോട് ആവശ്യപ്പെട്ടിട്ടുണ്ട്. “വിദേശത്ത് സ്ഥിരതാമസമാക്കിയ ഇന്ത്യക്കാരുടെയും സനാതന അനുയായികളുടെയും ആഗ്രഹം ഞങ്ങൾ മനസ്സിലാക്കുന്നു. കാശി, അയോദ്ധ്യ തുടങ്ങിയ പുണ്യസ്ഥലങ്ങൾ സന്ദർശിക്കാനും പ്രാർഥിക്കാനും അനുഗ്രഹം തേടാനും അവർ ആഗ്രഹിക്കുന്നു. എങ്കിലും, തൊഴിൽപരമായും മറ്റ് പ്രതിബദ്ധതകളാലും പലർക്കും ഇന്ത്യയിലേക്ക് യാത്ര ചെയ്യാൻ കഴിയുന്നില്ല. ഈ ആവശ്യം പരിഹരിക്കുന്നതിനായി, ക്ഷേത്രങ്ങൾ സ്ഥാപിക്കാനും വിഗ്രഹങ്ങൾ പ്രതിഷ്ഠിക്കാനും ഫൗണ്ടേഷൻ തീരുമാനിച്ചു. ആംസ്റ്റർഡാമിന് ശേഷം, ബ്രസൽസ് (ബെൽജിയം), ജർമ്മനി, ഫ്രാൻസ്, യൂറോപ്പിന്റെ മറ്റ് ഭാഗങ്ങൾ, കൂടാതെ തെക്കേ അമേരിക്കൻ രാജ്യങ്ങളിലും പോലും ശ്രീരാമ വിഗ്രഹങ്ങൾ സ്ഥാപിക്കും “ – രാഹുൽ മുഖർജി പറഞ്ഞു.
