അമൃത്സർ: ഡ്രോൺ ഉപയോച്ച് കടത്താൻ ശ്രമിച്ച മയക്കുമരുന്ന് പിടിച്ചെടുത്ത് അതിർത്തി രക്ഷാ സേന. പഞ്ചാബിലെ ഫിറോസ്പൂർ ജില്ലയുടെ അതിർത്തി പ്രദേശത്ത് നിന്നാണ് ഡ്രോൺ ഉപയോഗിച്ച് കടത്താൻ ശ്രമിച്ച മയക്കുമരുന്ന് പിടിച്ചെടുത്തത്. പ്രദേശത്ത് ഡ്രോണിന്റെ സാന്നിധ്യം കണ്ടെത്തിയിരുന്നു തുടർന്ന് നടത്തിയ പരിശോധനയിലാണ് മയക്കുമരുന്ന് പിടികൂടിയതെന്ന് സുരക്ഷാ സേന പുറത്തുവിട്ട വാർത്താക്കുറിപ്പിൽ അറിയിച്ചു.
പുർച്ചെ 5.20ഓടെയാണ് പ്രദേശത്ത് ഡോണിന്റെ സാന്നിധ്യം തിരിച്ചറിഞ്ഞത്. തുടർന്ന് സമീപത്തെ കൃഷിയിടത്തിൽ നിന്ന് ഒരു ഡ്രോൺ കണ്ടെടുത്തു. 2.710 കിലോഗ്രാം ഭാരമുള്ള 3 പാക്കറ്റ് ഹെറോയിൻ ഡ്രോണിൽ കെട്ടിവച്ച നിലയിൽ കണ്ടെത്തി. ഡ്രോണിൽ ഒരു ചെറിയ ടോർച്ചും പച്ച നിറത്തിലുള്ള ചെറിയ പന്തും ഘടിപ്പിച്ചിരിക്കുന്നതായി കണ്ടെത്തി.
ചൈന നിർമ്മിത ഡിജെഐ മാട്രിക്സ് 300 ആർടികെ ഡ്രോണാണ് പിടികൂടിയത്. ഇതിലൂടെ രാജ്യാതിർത്തി വഴി മയക്കുമരുന്ന് കടത്താനുള്ള ഒരു ശ്രമം കൂടി തടയാൻ സാധിച്ചെന്ന് സുരക്ഷാ സേന അറിയിച്ചു.
