ന്യൂഡൽഹി: ഇന്ത്യയിൽ നിന്നുള്ള വിനോദസഞ്ചാരികൾക്ക് വിസയിൽ ഇളവ് നൽകുന്ന പദ്ധതിയുടെ കാലാവധി നീട്ടി തായ്‌ലാൻഡ്. 2024 വർഷത്തിൽ ഭാരതത്തിൽ നിന്ന് അനേകം വിനോദസഞ്ചാരികൾ എത്തിയതിന്റെ പശ്ചാത്തലത്തിലാണ് വിസ-രഹിത പ്രവേശനം 2024 നവംബർ 11 വരേയ്‌ക്ക് നീട്ടിയത്. കഴിഞ്ഞ വർഷം നവംബറിൽ നിലവിൽ വന്ന വിസ ഇളവിന്റെ കാലാവധി മെയ് 10ന് തീരാനിരിക്കെയാണ് തീരുമാനം.
നേരത്തെ തായ്‌ലാൻഡിലെത്തുന്ന ഭാരതീയർക്ക് വിസ-ഓൺ-എറൈവലാണ് ലഭിച്ചിരുന്നത്. ഇതുപ്രകാരം 15 ദിവസം തായ്‌ലാൻഡിൽ ചെലവഴിക്കാം. എന്നാൽ രാജ്യത്തെ ടൂറിസം മേഖലയെ പുനരുജ്ജീവിപ്പിക്കുന്നതിനായി തായ്‌ലാൻഡ് സർക്കാർ ഇന്ത്യൻ പാസ്പോർട്ട് ഉടമകൾക്ക് കൂടുതൽ ഇളവുകൾ നൽകിയിരുന്നു. ഇതിന്റെ ഭാഗമായി വിസയില്ലാതെ 30 ദിവസം വരെ ഇന്ത്യക്കാർക്ക് തായ്‌ലാൻഡിൽ തങ്ങാം.
തായ്‌ലാൻഡിലേക്കുള്ള യാത്രാ ചെലവുകൾ താരതമ്യേന കുറവായതിനാൽ വിസ-രഹിത പ്രവേശനം സാധ്യമായതോടെ ലോകം ചുറ്റാൻ ആഗ്രഹിക്കുന്ന നിരവധി ഇന്ത്യക്കാരാണ് തായ്‌ലാൻഡ് സന്ദർശിക്കുന്നത്. രാജ്യത്തെ സ്ട്രീറ്റ് ഫുഡുകളും പുരാതന ക്ഷേത്രങ്ങളും ബീച്ചുകളും അതിമനോഹരമാണ്. അതിനാൽ ഒരിക്കൽ തായ്‌ലാൻഡ് സന്ദർശിച്ച ഇന്ത്യക്കാർ വീണ്ടും തായ്‌ലാൻഡിലെത്തുന്നതും പതിവാണ്.
