ശ്രീനഗർ: കശ്മീരിൽ നാല് ഭീകരരുടെ സ്വത്തുക്കൾ കൂടി എൻഐഎ കണ്ടുകെട്ടി. കശ്മീരിലെ കുപ് വാരയിലുള്ള ഭീകരരുടെ സ്വത്തുക്കളാണ് കണ്ടുകെട്ടിയത്. മുഹമ്മദ് ആലം ഭട്ട്, മുഹമ്മദ് യൂസഫ് ഖവാജ, ഷബീർ അഹമ്മദ് ഗഖാദ്, സക്കീർ ഹുസൈൻ എന്നിവരുടെ സ്വത്തുക്കളാണ് അന്വേഷണ സംഘം കണ്ടുകെട്ടിയത്.
വാഹനങ്ങളുൾപ്പെടെ ഭീകരരുമായി ബന്ധമുള്ള എല്ലാ വസ്തുക്കളും എൻഐഎ കണ്ടുകെട്ടിയിട്ടുണ്ട്. ആയുധങ്ങൾ സൂക്ഷിക്കുന്നതിനും ഭീകരാക്രമണങ്ങൾക്ക് ഗൂഢാലോചന നടത്തുന്നതിനും പ്രതികൾ ഈ കെട്ടിടങ്ങളും വീടുകളും ഉപയോഗിച്ചിരുന്നതായി എൻഐഎ അറിയിച്ചു.
പാകിസ്താനിലെ ഭീകരരുമായി പ്രതികൾക്ക് ബന്ധമുണ്ടെന്ന് അന്വേഷണ സംഘം കണ്ടെത്തിയിരുന്നു. ഭീകരാക്രമണ പ്രവർത്തനങ്ങൾക്കായി ആയുധങ്ങൾ വിതരണം ചെയ്തവരിൽ ഇവർ ഉൾപ്പെട്ടിരുന്നതായി എൻഐഎ അന്വേഷണത്തിൽ വ്യക്തമാക്കിയിട്ടുണ്ട്.
കശ്മീരിലെ യുവാക്കളെ ഭീകരവാദ സംഘടനകളിലേക്ക് റിക്രൂട്ട് ചെയ്തതായും ഭീകരാക്രമണങ്ങൾ ചെയ്യാൻ നിർബന്ധിപ്പിച്ചിരുന്നതായും എൻഐഎ കണ്ടെത്തിയിരുന്നു.