ന്യൂഡൽഹി : കേന്ദ്ര ഉപരിതല ഗതാഗത മന്ത്രാലയത്തിന്റെ ഭാരത് മാല പദ്ധതിയിൽ ഉൾപ്പെടുത്തി 10 എക്സ്പ്രസ് വേകളാണ് ഇന്ത്യയിൽ ഒരുങ്ങുന്നത് . റോഡ് യാത്രയെ പൂർണ്ണമായും മാറ്റി മറിയ്ക്കുന്ന പുതിയ പദ്ധതികളെ കുറിച്ച് അറിയാം .
1. ഡൽഹി-മുംബൈ എക്സ്പ്രസ് വേ
ഇന്ത്യയിൽ നിർമ്മാണത്തിലിരിക്കുന്ന ഏറ്റവും പ്രധാനപ്പെട്ട എക്സ്പ്രസ് വേകളിൽ ഒന്നാണ് ഡൽഹി-മുംബൈ എക്സ്പ്രസ്വേ . 1,386 കിലോമീറ്റർ ദൈർഘ്യമുള്ളതാണ് ഈ എക്സ്പ്രസ് വേ . രണ്ട് നഗരങ്ങൾക്കിടയിലുള്ള യാത്രാ സമയം 12 മണിക്കൂറായി കുറയ്ക്കാനാകുന്ന പദ്ധതിയാണിത് . ഡൽഹി, ഹരിയാന, ഉത്തർപ്രദേശ്, രാജസ്ഥാൻ, ഗുജറാത്ത്, മധ്യപ്രദേശ്, ദാദ്ര ആൻഡ് നഗർ ഹവേലി, മഹാരാഷ്ട്ര എന്നീ സംസ്ഥാനങ്ങളിലൂടെയാണ് ഇത് കടന്നു പോകുക.
2. വാരണാസി-റാഞ്ചി-കൊൽക്കത്ത എക്സ്പ്രസ് വേ
വാരണാസിയിൽ നിന്ന് റാഞ്ചി വഴി കൊൽക്കത്തയിലേക്കുള്ള ഈ എക്സ്പ്രസ് വേ ഉത്തർപ്രദേശ്, ബിഹാർ, ജാർഖണ്ഡ്, പശ്ചിമ ബംഗാൾ എന്നിവിടങ്ങളിലൂടെ കടന്നുപോകും . 612 കിലോമീറ്റർ ദൈർഘ്യമുള്ള പ്രവേശന നിയന്ത്രിത ഇടനാഴിയാകുമിത് . ഇതു വഴി വാരണാസി-റാഞ്ചി-കൊൽക്കത്ത യാത്രാ സമയം 15 മണിക്കൂറിൽ നിന്ന് 9 മണിക്കൂറായി കുറയും .
3. ഹൈദരാബാദ്-വിശാഖപട്ടണം എക്സ്പ്രസ് വേ
ഹൈദരാബാദ് മുതൽ വിശാഖപട്ടണം വരെയുള്ള അതിവേഗ പാതയാണിത് . തെലങ്കാന, ആന്ധ്രാപ്രദേശ് എന്നിവിടങ്ങളിലൂടെ കടന്നു പോകുന്ന ഇതിന് 222 കിലോമീറ്റർ ദൈർഘ്യമാണിതിനുള്ളത് .
4. ഡൽഹി-ഡെറാഡൂൺ എക്സ്പ്രസ് വേ
സഹാറൻപൂർ വഴിയുള്ള ഡൽഹി-ഡെറാഡൂൺ എക്സ്പ്രസ് വേയും പ്രവേശന നിയന്ത്രിത ഇടനാഴിയാണ് . 239 കിലോമീറ്റർ ദൈർഘ്യമുള്ള എക്സ്പ്രസ് വേ വരുന്നതോടെ ഡൽഹി-ഡെറാഡൂൺ യാത്രാ സമയം 2.5 മണിക്കൂറായി കുറയും .രാജാജി നാഷണൽ പാർക്കിന്റെ ഇക്കോ സെൻസിറ്റീവ് സോണിലൂടെയാണ് ഇത് കടന്നുപോകുന്നത്. 340 മീറ്റർ ദത്ത് കാലി തുരങ്കം ഉൾപ്പെടുന്ന 12 കിലോമീറ്റർ എലിവേറ്റഡ് വന്യജീവി ഇടനാഴിയാണ് നിർമിക്കുന്നത്. ചുറ്റുമുള്ള വന്യജീവികളെ സംരക്ഷിക്കാനാണ് തുരങ്കം നിർമ്മിക്കുന്നത്.
5. സൂറത്ത്-നാസിക്-സോലാപൂർ എക്സ്പ്രസ് വേ
സൂറത്ത്-നാസിക്-അഹമ്മദ്നഗർ-സോലാപൂർ എക്സ്പ്രസ് വേ ഗുജറാത്ത്, മഹാരാഷ്ട്ര എന്നിവിടങ്ങളിലൂടെയാണ് കടന്നുപോകുന്നത് . 730 കിലോമീറ്റർ ദൈർഘ്യമാണിതിനുള്ളത് .
6. ഡൽഹി-അമൃത്സർ-കത്ര എക്സ്പ്രസ് വേ
ഡൽഹിയും കത്രയും തമ്മിലുള്ള യാത്രാസമയം 6 മണിക്കൂറായി കുറയ്ക്കാൻ സഹായിക്കുന്ന പദ്ധതിയാണിത് . ഡൽഹി, ഹരിയാന, പഞ്ചാബ്, ജമ്മു കശ്മീർ എന്നിവിടങ്ങളിലൂടെയാകും ഇത് കടന്നു പോകുക.
7. ഇൻഡോർ-ഹൈദരാബാദ് എക്സ്പ്രസ് വേ
ഇൻഡോർ മുതൽ ഹൈദരാബാദ് വരെയുള്ള അതിവേഗ പാത മധ്യപ്രദേശ്, മഹാരാഷ്ട്ര, തെലങ്കാന എന്നിവിടങ്ങളിലൂടെയാകും കടന്നു പോകുക . 525 കിലോമീറ്റർ ദൂരമാണ് ഈ എക്സ്പ്രസ് വേ നീണ്ടുകിടക്കുന്നത്.
8. കാൺപൂർ-ലക്നൗ എക്സ്പ്രസ് വേ
കാൺപൂർ മുതൽ ലക്നൗ വരെയുള്ള എക്സ്പ്രസ്വേയ്ക്ക് 63 കിലോമീറ്റർ ദൈർഘ്യമാണുള്ളത് .
9. അമൃത്സർ-ഭട്ടിൻഡ-ജാംനഗർ എക്സ്പ്രസ് വേ
അമൃത്സറിൽ നിന്ന് ഭട്ടിൻഡ വഴി ജാംനഗറിലേക്കുള്ള ഈ എക്സ്പ്രസ് വേയ്ക്ക് 917 കിലോമീറ്റർ ദൈർഘ്യമുണ്ട് . പഞ്ചാബ്, ഹരിയാന, രാജസ്ഥാൻ, ഗുജറാത്ത് എന്നിവിടങ്ങളിലൂടെയാണ് ഈ എക്സ്പ്രസ് വേ കടന്നുപോകുന്നത്.
10. ബെംഗളൂരു-ചെന്നൈ എക്സ്പ്രസ് വേ
രണ്ട് നഗരങ്ങൾക്കിടയിലുള്ള യാത്രാ സമയം വെറും 2 മണിക്കൂറായി കുറയ്ക്കുന്ന പദ്ധതിയാണിത് . 262 കിലോമീറ്റർ ദൂരത്തിൽ നീണ്ടുകിടക്കുന്നതാണ് ഈ എക്സ്പ്രസ് വേ.
